ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠰᠣᠶᠣᠯ ᠡᠷᠳᠡᠨᠢ
ᠦᠢᠯᠡᠴᠢᠯᠡᠭᠡ
ᠳᠠᠭᠠᠳᠬᠠᠯ 2
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2024/8/29
     ᠲᠡᠭᠡᠬᠦ ᠮᠦᠷᠲᠡᠭᠡᠨ ᠦᠴᠦᠭᠡᠳᠦᠷ ᠰᠢᠶᠠᠩ ᠯᠢᠨ ᠪᠡᠷᠭᠡᠨ ᠲᠠᠢ ᠤᠴᠠᠷᠠᠭᠰᠡᠨ ᠶᠠᠪᠤᠳᠠᠯ ᠨᠡᠩ ᠨᠠᠮ᠎ᠡ ᠶᠢ ᠠᠮᠤᠷ ᠰᠠᠭᠤᠵᠤ ᠴᠢᠳᠠᠬᠤ ᠦᠭᠡᠢ ᠪᠤᠯᠭᠠᠵᠠᠢ᠃ ᠦᠳᠡ ᠠᠴᠠ ᠬᠤᠶᠢᠰᠢᠬᠢ ᠤᠴᠢᠷ ᠪᠠᠶᠢᠭᠰᠡᠨ ᠪᠢᠯᠡ᠃ ᠪᠢ ᠪᠠᠯᠭᠠᠰᠤᠨ ᠤ ᠵᠠᠭᠦᠨᠲᠡᠢ ᠤᠴᠢᠵᠤ ᠨᠠᠶᠢᠵᠢ ᠲᠠᠢ ᠪᠠᠨ ᠠᠭᠤᠯᠵᠠᠵᠤ ᠭᠠᠷᠴᠤ ᠢᠷᠡᠭᠡᠳ ᠭᠤᠤᠯ ᠤᠨ ᠡᠷᠬᠢ ᠳᠡᠭᠡᠷ᠎ᠡ ᠶᠠᠪᠤᠵᠤ ᠪᠠᠶᠢᠭᠠᠳ ᠲᠡᠭᠦᠨ ᠲᠠᠢ ᠤᠴᠠᠷᠠᠭᠰᠡᠨ ᠶᠤᠮ᠃ ᠲᠡᠭᠡᠬᠦ ᠳᠤ ᠪᠦᠯᠲᠡᠶᠢᠨ ᠰᠢᠷᠲᠡᠭᠰᠡᠨ ᠬᠠᠷᠠᠴᠡ ᠠᠴᠠ ᠨᠢ ᠢᠪ ᠢᠯᠡᠷᠭᠡᠢ ᠨᠠᠳᠠ ᠤᠷᠤᠭᠤ ᠢᠷᠡᠵᠤ ᠪᠠᠶᠢᠭ᠎ᠠ ᠨᠢ ᠮᠡᠳᠡᠭᠳᠡᠵᠤ ᠪᠠᠶᠢᠭᠰᠡᠨ ᠶᠤᠮ᠃ ᠡᠨᠡ ᠤᠳᠠᠭ᠎ᠠ ᠯᠤ᠋ ᠪᠠᠯᠭᠠᠰᠤᠨ ᠳᠤ ᠬᠠᠷᠢᠵᠤ ᠢᠷᠡᠭᠰᠡᠨ ᠤ ᠳᠠᠷᠠᠭ᠎ᠠ ᠤᠯᠵᠤ ᠦᠵᠡᠭᠰᠡᠨ ᠬᠦᠮᠦᠰ ᠤᠨ ᠲᠤᠲᠤᠷ᠎ᠠ ᠬᠤᠪᠢᠷᠠᠯᠲᠡ ᠶᠡᠭᠡ ᠪᠠᠷ ᠢᠶᠠᠨ ᠲᠡᠭᠦᠨ ᠢ ᠳᠠᠪᠠᠭ᠋ᠤ ᠬᠦᠮᠦᠨ ᠦᠭᠡᠢ ᠭᠡᠵᠤ ᠬᠡᠯᠡᠵᠤ ᠪᠤᠯᠤᠨ᠎ᠠ᠃ ᠲᠠᠪᠤᠨ ᠵᠢᠯ ᠤᠨ ᠡᠮᠦᠨᠠᠬᠢ ᠪᠤᠭᠤᠷᠤᠯᠰᠢᠭᠰᠡᠨ ᠭᠡᠵᠢᠭᠡ ᠨᠢ ᠤᠳᠤ ᠪᠦᠷ ᠴᠤᠯ ᠴᠠᠭᠠᠨ ᠪᠤᠯᠴᠢᠬᠠᠵᠤ ᠳᠦᠴᠢ ᠤᠷᠴᠢᠮ ᠨᠠᠰᠤᠨ ᠤ ᠬᠦᠮᠦᠨ ᠤ ᠰᠢᠨᠵᠢ ᠤᠭᠲᠤ ᠦᠭᠡᠢ ᠪᠤᠯᠵᠠᠢ᠃ ᠴᠢᠷᠠᠢ ᠨᠢ ᠦᠵᠡᠬᠦ ᠶᠢᠨ ᠠᠷᠭ᠎ᠠ ᠦᠭᠡᠢ ᠲᠤᠷᠠᠵᠤ ᠶᠠᠩᠬᠢᠢᠨ ᠰᠢᠷᠠᠯᠠᠵᠤ ᠬᠦᠭᠡᠷᠡᠭᠡᠳ ᠤᠷᠢᠳ ᠤᠨ ᠭᠤᠨᠢᠭᠯᠠᠭᠤᠨ ᠰᠢᠨᠵᠢ ᠨᠢ ᠪᠠᠯᠠᠯᠤᠭᠳᠠᠵᠤ ᠠᠷᠢᠯᠤᠭᠠᠳ ᠮᠤᠳᠤᠨ ᠰᠡᠶᠢᠯᠦᠮᠡᠯ ᠰᠢᠭ ᠪᠤᠯᠤᠭᠰᠡᠨ ᠪᠠᠶᠢᠯ᠎ᠠ᠃ ᠨᠢᠳᠦᠨ ᠴᠡᠴᠡᠭᠡᠢ ᠨᠢ ᠬᠠᠶᠡ ᠨᠢᠭᠡ ᠡᠷᠬᠢᠯᠳᠦᠵᠤ ᠠᠪᠬᠤᠯᠠᠷ ᠰᠠᠶ᠋ᠢ ᠲᠡᠭᠦᠨ ᠢ ᠠᠮᠢ ᠲᠠᠢ ᠶᠠᠭᠤᠮ᠎ᠡ ᠭᠡᠵᠤ ᠮᠡᠳᠡᠨ᠎ᠡ᠃ ᠲᠡᠷᠡ ᠨᠢᠭᠡ ᠭᠠᠷ  ᠲᠤ ᠪᠠᠨ ᠬᠤᠯᠤᠰᠤᠨ ᠰᠠᠭᠰᠤ ᠲᠤᠬᠤᠶᠢᠯᠠᠵᠠᠢ᠃ ᠲᠤᠲᠤᠷ᠎ᠠ ᠨᠢ ᠡᠮᠲᠡᠷᠭᠡᠢ ᠠᠶᠠᠭ᠎ᠠ ᠲᠠᠢ᠂ ᠠᠶᠠᠭ᠎ᠠ ᠨᠢ ᠬᠤᠭᠤᠰᠤᠨ ᠪᠠᠶᠢᠪᠠ᠃ ᠨᠦᠬᠦᠭᠡ ᠭᠠᠷ ᠲᠤ ᠪᠠᠨ ᠪᠡᠶ᠎ᠡ ᠠᠴᠠ ᠪᠠᠨ ᠬᠤᠯᠡ ᠦᠨᠳᠦᠷ᠂ ᠶᠤᠵᠤᠭᠤᠷ ᠨᠢ ᠰᠠᠯᠪᠠᠷᠠᠭᠰᠡᠨ ᠬᠤᠯᠤᠰᠤᠨ ᠲᠠᠶᠠᠭ ᠪᠠᠷᠢᠵᠠᠢ᠃ ᠲᠡᠷᠡ ᠨᠢᠭᠡᠮᠦᠰᠦᠨ ᠭᠤᠶᠢᠷᠠᠨᠴᠢ ᠬᠡᠮᠡᠷ ᠪᠤᠯᠴᠢᠬᠠᠭᠰᠡᠨ ᠨᠢ ᠢᠯᠡᠷᠭᠡᠢ ᠪᠠᠶᠢᠯ᠎ᠠ᠃        ᠪᠢ ᠤᠷᠤᠨ ᠳᠤ ᠪᠠᠨ ᠵᠤᠭᠰᠤᠴᠢᠬᠠᠭᠠᠳ ᠵᠤᠭᠤᠰ ᠢᠷᠡᠵᠤ ᠭᠤᠶᠤᠬᠤ ᠶᠢ ᠨᠢ ᠬᠦᠯᠢᠶᠡᠯ᠎ᠡ᠃ ︽ᠴᠢ ᠬᠠᠷᠢᠭᠠᠳ ᠢᠷᠡᠴᠢᠭᠡᠪᠡ ᠤᠤ︖︾ ᠭᠡᠵᠤ ᠲᠡᠷᠡ ᠤᠷᠢᠳ ᠢᠶᠠᠷ ᠠᠰᠠᠭᠤᠵᠤ ᠭᠠᠷᠤᠯ᠎ᠡ᠃ ︽ᠲᠡᠶᠢᠮᠦ ᠡ︾᠃ ︽ᠶᠠᠭ ᠰᠠᠶᠢᠬᠠᠨ ᠪᠤᠯᠵᠠᠢ᠃ ᠴᠢ ᠴᠢᠨᠢ ᠪᠢᠴᠢᠭ ᠲᠠᠢ ᠬᠦᠮᠦᠨ᠂ ᠲᠡᠭᠡᠬᠦ ᠮᠦᠷᠲᠡᠭᠡᠨ ᠭᠠᠳᠠᠭᠰᠢ ᠶᠠᠪᠤᠭᠰᠡᠨ ᠬᠦᠮᠦᠨ᠂ ᠦᠵᠡᠵᠤ ᠮᠡᠳᠡᠭᠰᠡᠨ ᠵᠦᠢᠯ ᠠᠷᠪᠢᠨ᠃ ᠪᠢ ᠶᠠᠭ ᠴᠢᠮ᠎ᠡ ᠠᠴᠠ ᠨᠢᠭᠡ ᠶᠠᠭᠤᠮ᠎ᠡ ᠠᠰᠠᠭᠤᠶ᠎ᠡ ᠭᠡᠵᠤ ᠪᠠᠶᠢᠭᠰᠡᠨ —︾ ᠭᠡᠳ ᠲᠡᠷᠡ ᠬᠦ ᠵᠢᠯᠭ᠎ᠠ ᠦᠭᠡᠢ ᠨᠢᠳᠦ ᠨᠢ ᠬᠡᠨᠡᠳᠲᠡ ᠬᠡᠷᠡᠯᠲᠦᠵᠡᠢ᠃  ᠪᠢ ᠲᠡᠭᠦᠨ ᠢ ᠢᠩᠬᠢᠵᠤ ᠶᠠᠷᠢᠨ᠎ᠠ ᠭᠡᠵᠤ ᠤᠭᠲᠤ ᠪᠤᠳᠤᠵᠤ ᠤᠯᠤᠭᠰᠡᠨ ᠦᠭᠡᠢ ᠪᠤᠯᠬᠤᠷ ᠭᠠᠶᠢᠬᠠᠰᠢ ᠠᠯᠳᠠᠨ ᠵᠤᠭᠰᠤᠵᠠᠢ᠃ ︽ᠡᠶᠢᠮᠦ ᠤᠴᠢᠷ —︾ ᠭᠡᠳ ᠲᠡᠷᠡ ᠬᠤᠶᠠᠷ ᠠᠯᠬᠤᠮ ᠳᠦᠬᠦᠵᠤ ᠳᠠᠭᠤ ᠪᠠᠨ ᠳᠤᠤᠷ᠎ᠠ ᠪᠤᠯᠭᠠᠨ ᠲᠤᠶᠢᠯ ᠤᠨ ᠨᠢᠭᠤᠴᠡ ᠳᠠᠯᠳᠠ ᠰᠢᠤᠬᠠᠨ ᠰᠢᠪᠡᠨᠡᠨ᠄ ︽ᠬᠦᠮᠦᠨ ᠦᠬᠦᠪᠡᠯ ᠴᠤᠬᠤᠮ ᠰᠦᠭ ᠰᠦᠨᠡᠰᠦ ᠭᠡᠵᠤ ᠪᠠᠶᠢᠳᠠᠭ ᠤᠤ ᠦᠭᠡᠢ ᠤᠤ︖︾ ᠭᠡᠯ᠎ᠡ᠃        ᠪᠢ ᠲᠤᠩ ᠠᠶᠢᠳᠠᠰ ᠬᠦᠷᠴᠤ ᠨᠠᠳᠠ ᠤᠷᠤᠭᠤ ᠰᠢᠷᠲᠡᠵᠤ ᠪᠠᠶᠢᠭ᠎ᠠ ᠨᠢᠳᠦ ᠶᠢ ᠨᠢ ᠬᠠᠷᠠᠮᠠᠭᠴᠡ ᠵᠤ ᠤᠷᠤᠭᠤ  ᠪᠠᠨ ᠰᠤᠷ ᠦᠷᠭᠡᠰᠦ ᠪᠠᠷ ᠬᠠᠳᠬᠤᠯᠤᠭᠠᠳ ᠠᠪᠤᠭᠰᠡᠨ ᠰᠢᠭ᠋ ᠪᠤᠯᠵᠤ᠂ ᠰᠤᠷᠤᠭᠴᠢ ᠪᠠᠶᠢᠬᠤ ᠳᠤ ᠪᠡᠯᠡᠳᠭᠡᠯ ᠦᠭᠡᠢ  ᠪᠠᠷ ᠬᠡᠨᠡᠳᠲᠡ ᠶᠢᠨ ᠰᠢᠯᠭᠠᠯᠲᠡ ᠳᠤ ᠦᠷᠲᠦᠭᠰᠡᠨ ᠲᠡᠳᠦᠢ ᠦᠭᠡᠢ ᠪᠠᠰᠡ ᠶᠠᠭ ᠰᠠᠶᠢᠬᠠᠨ ᠪᠠᠭᠰᠢ ᠳᠡᠷᠭᠡᠳᠡ ᠵᠤᠭᠰᠤᠴᠢᠬᠠᠭᠰᠡᠨ ᠦᠶ᠎ᠡ ᠠᠴᠠ ᠴᠤ ᠢᠯᠡᠭᠦᠦ ᠪᠠᠯᠠᠭ ᠠᠯᠳᠠᠵᠠᠢ᠃ ᠰᠦᠭ ᠰᠦᠨᠡᠰᠦ ᠤᠷᠤᠰᠢᠳᠠᠭ ᠡᠰᠡ ᠬᠦ ᠲᠤᠬᠠᠢ ᠪᠢ ᠶᠡᠷᠦ ᠠᠴᠠ ᠪᠠᠨ ᠤᠭᠲᠤ ᠰᠡᠳᠬᠢᠯ ᠲᠠᠯᠪᠢᠳᠠᠭ ᠦᠭᠡᠢ ᠪᠠᠶᠢᠭᠰᠡᠨ ᠶᠤᠮ᠃ ᠭᠡᠲᠡᠯ᠎ᠡ ᠡᠨᠡ ᠮᠦᠴᠡ ᠳᠤ ᠲᠡᠭᠦᠨ  ᠳᠤ ᠶᠠᠭᠠᠬᠢᠵᠤ ᠬᠠᠷᠢᠭᠤᠯᠪᠠᠯ ᠵᠤᠬᠢᠬᠤ ᠪᠢᠯᠡ︖ ᠪᠢ ᠠᠭᠱᠠᠨ ᠵᠠᠭᠤᠷ᠎ᠠ ᠲᠦᠲᠡᠭᠡᠯᠵᠡᠭᠰᠡᠨ ᠢᠶᠠᠨ᠂ ᠠᠳᠡᠬᠢ ᠬᠦᠮᠦᠰ ᠵᠤᠷᠰᠢᠯ ᠢᠶᠠᠷ ᠢᠶᠠᠨ ᠪᠤᠯ ᠴᠢᠳᠬᠦᠷ ᠪᠠᠶᠢᠳᠠᠭ ᠢ ᠢᠳᠡᠭᠡᠲᠡᠭ ᠶᠤᠮ ᠰᠠᠨ᠂ ᠭᠡᠲᠡᠯ᠎ᠡ ᠲᠡᠷᠡ ᠬᠠᠷᠢᠨ ᠡᠭᠡᠳᠡᠷᠡᠵᠤ ᠪᠠᠶᠢᠨ᠎ᠠ — ᠡᠰᠡᠭᠦᠯ᠎ᠡ ᠬᠦᠰᠡᠵᠤ ᠪᠠᠶᠢᠨ᠎ᠠ ᠭᠡᠵᠤ ᠬᠡᠯᠡᠬᠦ ᠶᠢ ᠬᠦᠷᠬᠦ ᠦᠭᠡᠢ᠄ ᠲᠡᠭᠦᠨ ᠤ ᠪᠠᠶᠢᠬᠤ ᠶᠢ ᠬᠦᠰᠡᠵᠤ ᠪᠠᠶᠢᠬᠤ ᠮᠦᠷᠲᠡᠭᠡᠨ ᠪᠠᠶᠢᠬᠤ ᠦᠭᠡᠢ ᠶᠢ ᠴᠦ ᠬᠦᠰᠡᠵᠤ ᠪᠠᠶᠢᠨ᠎ᠠ ᠁ ᠡᠴᠦᠰ ᠵᠠᠮ ᠳᠤ ᠪᠠᠨ ᠤᠷᠤᠴᠢᠬᠠᠭᠰᠡᠨ ᠬᠦᠮᠦᠨ ᠤ ᠵᠤᠪᠠᠯᠠᠩ ᠢ ᠨᠡᠮᠡᠭᠳᠡᠭᠦᠯᠦᠭᠡᠳ ᠶᠠᠭᠠᠬᠢᠬᠤ ᠪᠤᠢ᠂ ᠲᠡᠭᠦᠨ ᠤ ᠲᠦᠯᠦᠭᠡ ᠪᠠᠶᠢᠨ᠎ᠠ ᠯᠡ ᠭᠡᠵᠤ ᠬᠠᠷᠢᠭᠤᠯᠬᠤ  ᠶᠢ ᠬᠦᠷᠬᠦ ᠦᠭᠡᠢ ᠭᠡᠵᠤ ᠪᠤᠳᠤᠵᠤ ᠭᠠᠷᠤᠯ᠎ᠡ᠃        ︽ᠪᠠᠶᠢᠵᠤ ᠴᠤ ᠮᠡᠳᠡᠨ᠎ᠡ — ᠮᠢᠨᠦ ᠪᠤᠳᠤᠬᠤ ᠪᠠᠷ︾ ᠭᠡᠵᠤ ᠪᠢ ᠲᠠᠲᠠᠭᠠᠯᠵᠠᠩᠭᠤᠶᠢᠬᠠᠨ ᠬᠡᠯᠡᠵᠡᠢ᠃  ︽ᠲᠡᠭᠡᠪᠡᠯ᠂ ᠡᠷᠯᠢᠭ ᠲᠠᠮᠤ ᠴᠤ ᠪᠠᠶᠢᠨ᠎ᠠ ᠪᠢᠵᠡ︖︾  ︽ᠠ︕ ᠲᠠᠮᠤ ᠤᠤ︖︾ ᠭᠡᠵᠤ ᠪᠢ ᠶᠡᠭᠡᠳᠡ ᠰᠤᠴᠢᠨ ᠲᠤᠷᠴᠤ ᠲᠡᠭᠡᠭᠯᠡᠭᠰᠡᠭᠡᠷ᠄ ︽ᠲᠠᠮᠤ ᠤᠤ︖ — ᠶᠤᠰᠤᠨ ᠳᠤ ᠪᠠᠨ ᠪᠤᠯ᠂ ᠪᠠᠰᠡ ᠪᠠᠶᠢᠬᠤ ᠶᠤᠰᠤᠲᠠᠢ᠃— ᠭᠡᠪᠡᠴᠤ ᠪᠠᠰᠡ ᠵᠠᠪᠠᠯ ᠪᠠᠶᠢᠳᠠᠭ ᠴᠤ ᠪᠢᠰᠢ ᠁ ᠡᠶᠢᠮᠦᠷᠬᠦ ᠶᠠᠪᠤᠳᠠᠯ ᠢ ᠬᠡᠨ ᠬᠠᠮᠢᠶᠠᠷᠬᠤ ᠪᠢᠯᠡ ᠁︾ ᠭᠡᠯ᠎ᠡ᠃ ︽ᠲᠡᠶᠢᠮᠦ ᠪᠤᠯ ᠦᠬᠦᠴᠢᠭᠡᠭᠰᠡᠨ ᠨᠢᠭᠡ ᠭᠡᠷ ᠤᠨ ᠬᠦᠮᠦᠨ ᠡᠴᠦᠰ ᠲᠤ ᠪᠠᠨ ᠪᠦᠷ ᠤᠴᠠᠷᠠᠵᠤ ᠴᠢᠳᠠᠨ᠎ᠠ ᠪᠢᠵᠡ︖︾ ︽ᠬᠠᠢ ᠳ᠋ᠠ᠂ ᠤᠴᠠᠷᠠᠨ᠎ᠠ ᠤᠤ ᠦᠭᠡᠢ ᠤᠤ︖ ᠁︾ ᠡᠨᠡ ᠦᠶ᠎ᠡ ᠪᠢ ᠰᠠᠶ᠋ᠢ ᠦᠪᠡᠷ ᠤᠨ ᠢᠶᠠᠨ ᠪᠦᠷᠢᠮᠦᠰᠦᠨ ᠪᠠᠯᠠᠢ ᠬᠦᠮᠦᠨ ᠪᠠᠶᠢᠭᠰᠠᠭᠠᠷ ᠭᠡᠳᠡᠭ ᠢ ᠮᠡᠳᠡᠵᠡᠢ᠃ ᠶᠠᠭᠠᠬᠢᠵᠤ ᠲᠠᠲᠠᠪ ᠶᠠᠲᠠᠪ ᠬᠢᠵᠤ ᠶᠠᠭᠠᠬᠢᠵᠤ ᠲᠦᠰᠦᠪᠯᠡᠭᠰᠡᠨ ᠪᠤᠯᠪᠠᠴᠤ ᠭᠤᠷᠪᠠᠭ᠋ᠠᠨ ᠠᠰᠠᠭᠤᠯᠲᠡ ᠶᠢ ᠬᠠᠷᠢᠭᠤᠴᠠᠵᠤ ᠴᠢᠳᠠᠭᠰᠡᠨ ᠦᠭᠡᠢ᠃ ᠪᠠᠢ ᠳᠠᠷᠤᠶᠢᠬᠠᠨ ᠵᠢᠷᠦᠭᠡᠰᠢᠶᠡᠵᠤ ᠡᠬᠢᠯᠡᠨ ᠡᠮᠦᠨᠠᠬᠢ ᠦᠭᠡ ᠪᠠᠨ ᠪᠦᠬᠦᠨ ᠢ ᠪᠤᠴᠠᠭᠠᠬᠤ ᠭᠡᠵᠤ᠄ ︽ᠲᠠᠷᠡ ᠴᠢᠨᠢ ᠁ ᠦᠨᠡᠨ ᠢ ᠬᠡᠯᠡᠪᠡᠯ᠂ ᠪᠢ ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ ᠁᠃ ᠦᠨᠡᠨ ᠳᠤ ᠪᠠᠨ᠂ ᠰᠦᠭ ᠰᠦᠨᠡᠰᠦ ᠴᠤᠬᠤᠮ ᠪᠠᠶᠢᠨ᠎ᠠ ᠤᠤ ᠦᠭᠡᠢ ᠤᠤ ᠭᠡᠳᠡᠭ ᠢ᠂ ᠪᠢ ᠪᠠᠰᠡ ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ︾ ᠭᠡᠯ᠎ᠡ᠃  ᠪᠢ ᠲᠡᠭᠦᠨ ᠤ ᠳᠠᠬᠢᠨ ᠱᠠᠯᠠᠪᠳᠠᠨ ᠠᠰᠠᠭᠤᠬᠤ ᠦᠭᠡᠢ ᠶᠢ ᠨᠢ ᠵᠠᠪᠳᠤᠨ ᠳᠠᠷᠤᠶᠢᠬᠠᠨ ᠰᠠᠯᠵᠤ ᠡᠴᠢᠨ ᠰᠡᠩᠳᠡ ᠮᠡᠩᠳᠡᠬᠡᠨ ᠠᠯᠬᠤᠵᠤ ᠯᠤ᠋ ᠳᠦᠷᠪᠡᠳᠦᠭᠡᠷ ᠠᠪᠠᠭ᠎ᠠ ᠶᠢᠨ ᠭᠡᠷ ᠲᠤ ᠲᠤᠲᠠᠭᠠᠵᠤ ᠬᠦᠷᠴᠠᠢ᠂ ᠰᠡᠳᠬᠢᠯ ᠲᠤᠲᠤᠷ᠎ᠠ ᠲᠤᠩ ᠠᠶᠠᠭᠦᠢ ᠰᠠᠨᠠᠭᠳᠠᠵᠤ ᠪᠠᠶᠢᠯ᠎ᠠ᠃ ᠮᠢᠨᠦ ᠬᠠᠷᠢᠭᠤᠯᠲᠡ ᠲᠡᠭᠦᠨ ᠳᠤ ᠪᠠᠭ᠎ᠠ ᠰᠠᠭ᠎ᠠ ᠴᠤ ᠭᠡᠰᠡᠨ ᠠᠶᠤᠯ ᠲᠠᠢ ᠪᠤᠯᠤᠭᠤᠵᠠᠢ ᠬᠡᠮᠡᠨ ᠪᠢ ᠡᠮᠢᠶᠠᠯ᠎ᠡ᠃ ᠲᠡᠷᠡ ᠪᠠᠷᠤᠭ ᠪᠤᠰᠤᠳ ᠬᠦᠮᠦᠰ ᠤᠨ ᠳᠠᠭᠠᠳᠬᠠᠯ ᠬᠢᠬᠦ ᠳᠤᠮᠳᠠ ᠠᠴᠠ ᠭᠠᠭᠴᠠᠭᠠᠷᠳᠠᠯ ᠢᠶᠠᠨ ᠰᠠᠷᠠᠵᠤ ᠤᠯᠤᠭᠰᠡᠨ ᠪᠠᠶᠢᠵᠤ ᠮᠡᠳᠡᠨ᠎ᠡ᠂ ᠬᠠᠷᠢᠨ ᠡᠰᠡᠭᠦᠯ᠎ᠡ ᠶᠠᠮᠠᠷᠬᠠᠨ ᠤᠨᠳᠤᠤ ᠰᠠᠨᠠᠭ᠎ᠠ ᠲᠠᠢ ᠴᠤ ᠶᠤᠮ ᠤᠤ ᠳ᠋ᠠ︖ — ᠡᠰᠡᠭᠦᠯ᠎ᠡ ᠶᠠᠮᠠᠷ ᠵᠦᠢᠯ ᠤᠨ ᠰᠤᠪᠢᠩ ᠲᠠᠢ ᠪᠤᠯᠤᠭᠰᠡᠨ ᠴᠤ ᠶᠤᠮ ᠤᠤ︖ ᠬᠡᠷᠪᠡ ᠤᠨᠳᠤᠤ ᠰᠠᠨᠠᠭ᠎ᠠ ᠲᠠᠢ ᠪᠤᠯᠤᠭᠠᠳ᠂ ᠮᠦᠨ ᠡᠭᠦᠨ ᠠᠴᠠ ᠪᠠᠨ ᠪᠤᠯᠵᠤ ᠤᠨᠳᠤᠤ ᠬᠡᠷᠡᠭ ᠡᠭᠦᠰᠴᠢᠬᠡᠪᠡᠯ᠂ ᠮᠢᠨᠦ ᠬᠠᠷᠢᠭᠤᠯᠲᠡ ᠦᠨᠡᠭᠡᠷ ᠬᠠᠷᠢᠨ ᠬᠠᠮᠢᠶ᠎ᠡ ᠪᠦᠬᠦᠢ ᠬᠠᠷᠢᠭᠤᠴᠠᠯᠭ᠎ᠠ ᠡᠭᠦᠷᠭᠡᠯᠡᠬᠦ ᠬᠡᠷᠡᠭᠲᠡᠢ ᠪᠤᠯᠤᠨ᠎ᠠ ᠳ᠋ᠠ ᠁ ᠭᠡᠵᠤ ᠪᠤᠳᠤᠵᠤ ᠭᠠᠷᠤᠯ᠎ᠡ᠃ ᠬᠡᠪᠡᠴᠤ ᠵᠠᠯᠭᠠᠭᠠᠳ ᠬᠠᠷᠢᠨ ᠪᠡᠶ᠎ᠡ ᠳᠤ ᠪᠠᠨ ᠢᠨᠢᠶᠡᠳᠤ ᠬᠦᠷᠴᠢᠭᠡᠯ᠎ᠡ᠃ ᠬᠡᠨᠡᠳᠲᠡ ᠶᠢᠨ ᠬᠡᠷᠡᠭ᠂ ᠤᠭ ᠠᠴᠠ ᠪᠠᠨ ᠶᠠᠮᠠᠷ ᠴᠤ ᠬᠦᠨ ᠤᠳᠬ᠎ᠠ ᠭᠡᠵᠤ ᠦᠭᠡᠢ ᠪᠠᠶᠢᠲᠠᠯ᠎ᠠ ᠪᠢ ᠬᠠᠷᠢᠨ ᠵᠤᠷᠢᠭᠤᠲᠡ ᠨᠠᠷᠢᠨ ᠵᠦᠢᠴᠢᠯᠡᠵᠤ ᠤᠬᠤᠴᠢᠯᠠᠬᠤ ᠴᠢᠨᠢ᠂ ᠶᠠᠭ ᠰᠤᠷᠭᠠᠨ ᠬᠦᠮᠦᠵᠢᠯ ᠤᠨ ᠡᠷᠳᠡᠮᠲᠡᠳ ᠲᠤ ᠮᠡᠳᠡᠷᠡᠯ ᠤᠨ ᠡᠪᠡᠳᠴᠢᠨ ᠤᠯᠵᠠᠢ ᠭᠡᠵᠤ ᠬᠡᠯᠡᠭᠳᠡᠬᠦ ᠬᠠᠴᠢᠨ ᠪᠢᠰᠢ ᠶᠤᠮ᠃ ᠭᠡᠬᠦ ᠮᠦᠷᠲᠡᠭᠡᠨ ︽ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ︾ ᠭᠡᠵᠤ ᠲᠤᠪ ᠲᠤᠲᠤᠷᠬᠠᠢ ᠬᠡᠯᠡᠴᠢᠭᠡᠵᠤ ᠬᠠᠷᠢᠭᠤᠯᠤᠭᠰᠡᠨ ᠦᠭᠡ ᠪᠠᠨ ᠪᠦᠬᠦᠨ ᠢ ᠪᠤᠴᠠᠭᠠᠭᠰᠡᠨ ᠲᠤᠯᠡ ᠶᠠᠮᠠᠷᠬᠠᠨ ᠬᠡᠷᠡᠭ ᠡᠭᠦᠰᠴᠢᠭᠡᠬᠦ ᠪᠠᠷ ᠪᠤᠳᠤᠴᠢᠬᠠᠬᠤ ᠳᠤ ᠨᠠᠳᠠ ᠲᠠᠢ ᠤᠭᠲᠤ ᠬᠠᠷᠢᠴᠠᠭ᠎ᠠ ᠦᠭᠡᠢ ᠪᠤᠯᠴᠢᠬᠠᠨ᠎ᠠ ᠳ᠋ᠠ ᠭᠡᠵᠤ ᠰᠠᠨᠠᠯ᠎ᠠ᠃  ︽ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ︾ ᠭᠡᠳᠡᠭ ᠪᠤᠯ ᠲᠤᠶᠢᠯ ᠤᠨ ᠬᠡᠷᠡᠭ ᠲᠠᠢ ᠦᠭᠡ ᠶᠤᠮ᠃ ᠲᠦᠭᠦᠭᠡ ᠤᠷᠤᠭ᠎ᠠ ᠦᠭᠡᠢ ᠠᠲᠠᠯ᠎ᠠ ᠡᠷᠡᠯᠭᠡᠭ ᠰᠦᠰᠦ ᠲᠠᠢ ᠪᠠᠭᠠᠴᠤᠤᠯ ᠬᠡᠭᠴᠢ ᠢᠮᠠᠭᠲᠡ ᠬᠦᠮᠦᠨ ᠤ ᠡᠷᠡᠭᠡᠯᠵᠡᠭᠡ ᠲᠠᠢ ᠠᠰᠠᠭᠤᠳᠠᠯ ᠢ ᠵᠤᠷᠢᠭ  ᠲᠠᠢ ᠰᠢᠢᠳᠪᠤᠷᠢᠯᠡᠵᠤ ᠦᠭᠳᠡᠭ᠃      ᠡᠮᠴᠢ ᠰᠤᠩᠭᠤᠭᠰᠡᠨ ᠤ ᠳᠠᠷᠠᠭ᠎ᠠ ᠡᠴᠦᠰ ᠲᠡᠭᠦᠰᠭᠡᠯ ᠨᠢ ᠰᠠᠶᠢᠨ ᠪᠢᠰᠢ ᠪᠤᠯ ᠶᠡᠭᠡ ᠲᠦᠯᠦᠪ ᠭᠡᠳᠡᠷᠬᠦ ᠪᠠᠨ ᠵᠢᠮᠡᠯᠡᠭᠳᠡᠯ ᠳᠤ ᠬᠦᠷᠳᠡᠭ᠃ ᠭᠡᠲᠡᠯ᠎ᠡ ᠡᠨᠡ ᠬᠦ ᠲᠤᠲᠤᠷᠬᠠᠢ ᠬᠡᠯᠡᠵᠤ ᠴᠢᠳᠠᠬᠤ ᠦᠭᠡᠢ ᠬᠡᠭᠴᠢ ᠪᠠᠷ ᠲᠡᠭᠦᠰᠭᠡᠪᠡᠯ ᠬᠠᠷᠢᠨ ᠬᠡᠷᠡᠭ ᠪᠦᠬᠦᠨ ᠳᠤ ᠰᠠᠨᠠᠭᠠᠨ ᠲᠠᠪᠠ ᠪᠠᠷ ᠢᠶᠠᠨ ᠪᠠᠶᠢᠵᠤ ᠴᠢᠳᠠᠨ᠎ᠠ᠃ ᠡᠨᠡ ᠦᠶᠡᠰ ᠪᠢ ᠡᠨᠡ ᠦᠭᠡᠨ ᠤ ᠴᠢᠬᠤᠯᠡ ᠴᠢᠨᠠᠷ ᠢ ᠨᠡᠩ ᠰᠡᠷᠡᠵᠤ ᠭᠤᠶᠢᠷᠠᠨᠴᠢ ᠡᠮᠡᠭᠲᠡᠢ ᠲᠠᠢ ᠶᠠᠷᠢᠯᠴᠠᠭᠰᠡᠨ ᠴᠤ ᠭᠡᠳ ᠶᠠᠭᠠᠬᠢᠭᠰᠡᠨ ᠴᠤ ᠳᠦᠭᠦᠮᠴᠢᠯᠡᠵᠤ ᠪᠤᠯᠬᠤ ᠦᠭᠡᠢ ᠭᠡᠳᠡᠭ ᠢ ᠮᠡᠳᠡᠵᠡᠢ᠃  ᠬᠡᠪᠡᠴᠤ ᠮᠢᠨᠦ ᠲᠤᠲᠤᠷ᠎ᠠ ᠶᠡᠷᠦ ᠲᠠᠶᠢᠪᠤᠩ ᠪᠤᠰᠤ ᠪᠠᠶᠢᠯ᠎ᠠ᠃ ᠨᠢᠭᠡ ᠦᠨᠵᠢᠴᠢᠭᠡᠭᠰᠡᠨ ᠪᠠᠶᠢᠲᠠᠯ᠎ᠠ ᠪᠠᠨ ᠮᠦᠨ ᠯᠡ ᠴᠠᠭ ᠢᠮᠠᠭᠲᠡ ᠪᠤᠳᠤᠭᠳᠠᠭᠠᠳ ᠪᠠᠶᠢᠪᠠ᠃ ᠶᠠᠭ ᠶᠠᠮᠠᠷ ᠨᠢᠭᠡᠨ ᠵᠤᠯ ᠪᠤᠰᠤ ᠰᠤᠪᠢᠩ ᠡᠪᠦᠷᠲᠦᠯᠡᠭᠳᠡᠭᠰᠡᠨ ᠰᠢᠭ᠂ ᠪᠦᠪ ᠪᠦᠷᠭᠦᠭ ᠴᠠᠰᠤ ᠲᠠᠢ ᠡᠳᠦᠷ᠂ ᠬᠢᠳᠡᠯ ᠠᠯᠳᠠᠭᠰᠡᠨ ᠪᠢᠴᠢᠭ  ᠤᠨ ᠦᠷᠦᠭᠡᠨ ᠳᠤ᠂ ᠡᠨᠡ ᠲᠠᠶᠢᠪᠤᠭᠤ ᠪᠤᠰᠤ ᠲᠦᠷᠦᠭᠳᠡᠯ ᠤᠯᠠᠮ ᠨᠡᠮᠡᠭᠳᠡᠵᠡᠢ᠃ ᠬᠠᠰᠢ ᠯᠡ ᠶᠠᠪᠤᠵᠤ ᠤᠳᠬᠤ ᠶᠢ ᠬᠦᠷᠬᠦ ᠦᠭᠡᠢ᠂ ᠮᠠᠷᠭᠠᠰᠢ ᠬᠤᠲᠠ ᠤᠷᠤᠶ᠎ᠡ᠃ ᠹᠦᠰᠢᠩ ᠠᠰᠠᠷ ᠤᠨ ᠵᠢᠭᠠᠰᠤᠨ ᠰᠡᠷᠪᠡᠭᠡᠨ ᠤ ᠴᠤᠯᠭᠤᠢ ᠴᠢᠨᠠᠯᠭ᠎ᠠ᠂ ᠨᠢᠭᠡ ᠲᠦᠭᠦᠷᠢᠭ ② ᠲᠤ ᠪᠠᠨ ᠨᠢᠭᠡ ᠫᠢᠯᠡ᠂ ᠬᠢᠮᠲᠡ ᠮᠦᠷᠲᠡᠭᠡᠨ ᠠᠮᠲᠠ ᠲᠠᠢ᠂ ᠤᠳᠤ ᠦᠨ᠎ᠡ ᠨᠢ ᠴᠤᠬᠤᠮ ᠦᠰᠦᠭᠰᠡᠨ ᠡᠰᠡ ᠬᠦ ᠶᠢ ᠦᠯᠦ ᠮᠡᠳᠡᠨ᠎ᠡ᠃ ᠤᠷᠢᠳᠤᠬᠢ ᠬᠠᠮᠲᠤ ᠪᠠᠷ ᠲᠤᠭᠤᠷᠢᠵᠤ ᠪᠠᠶᠢᠭᠰᠡᠨ ᠨᠠᠶᠢᠵᠢ ᠨᠠᠷ ᠮᠢᠨᠢ ᠬᠡᠳᠦᠢ ᠪᠠᠷ ᠡᠭᠦᠯᠡᠰ ᠰᠢᠭ ᠰᠠᠷᠨᠢᠵᠤ ᠡᠴᠢᠭᠰᠡᠨ ᠪᠤᠯᠪᠠᠴᠤ ᠵᠢᠭᠠᠰᠤᠨ ᠰᠡᠷᠪᠡᠭᠡ ᠶᠢ ᠪᠤᠯ ᠬᠠᠷᠢᠨ ᠢᠳᠡᠬᠦ ᠦᠭᠡᠢ ᠪᠠᠶᠢᠵᠤ ᠦᠯᠦ ᠪᠤᠯᠤᠨ᠎ᠠ᠂ ᠪᠢ ᠭᠠᠭᠴᠠ ᠪᠠᠷ ᠢᠶᠠᠨ ᠪᠠᠶᠢᠭᠰᠡᠨ ᠴᠤ ᠶᠠᠭᠠᠬᠢᠨ᠎ᠠ ᠪᠤᠢ ᠁᠃      ᠶᠠᠮᠠᠷ ᠪᠠᠶᠢᠯ᠎ᠡ ᠴᠤ ᠭᠡᠳ ᠪᠢ ᠮᠠᠷᠭᠠᠰᠢ ᠶᠠᠪᠤᠬᠤ ᠪᠠᠷ ᠰᠢᠢᠳᠤᠯ᠎ᠡ᠃  ᠲᠦᠰᠦᠭᠡᠯᠡᠵᠤ ᠪᠠᠶᠢᠭᠰᠡᠨ ᠢᠶᠠᠷ ᠪᠢᠲᠡᠭᠡᠢ ᠪᠤᠯᠤᠭᠠᠰᠠᠢ᠂ ᠲᠦᠰᠦᠭᠡᠯᠡᠵᠤ ᠪᠠᠶᠢᠭᠰᠡᠨ ᠢᠶᠠᠷ ᠪᠤᠯᠴᠢᠬᠠᠳᠠᠭ ᠯᠡ ᠪᠢᠰᠢ ᠳ᠋ᠠ ᠭᠡᠵᠤ ᠪᠤᠳᠤᠵᠤ ᠪᠠᠶᠢᠭᠰᠡᠨ ᠶᠠᠪᠤᠳᠠᠯ ᠤᠳᠠᠭ᠎ᠠ ᠪᠤᠯᠭᠠᠨ ᠬᠠᠷᠢᠨ ᠲᠦᠰᠦᠭᠡᠯᠡᠵᠤ ᠪᠠᠶᠢᠭᠰᠡᠨ ᠢᠶᠠᠷ ᠪᠤᠯᠴᠢᠬᠠᠳᠠᠭ ᠦᠷᠭᠦᠯᠵᠢ ᠳᠤᠬᠢᠶᠠᠯᠳᠤᠳᠠᠭ ᠪᠤᠯᠬᠤᠷ ᠡᠨᠡ ᠶᠠᠪᠤᠳᠠᠯ ᠢ ᠴᠦ ᠢᠩᠬᠢᠭᠦᠵᠠᠢ ᠬᠡᠮᠡᠨ ᠪᠢ ᠮᠠᠰᠢ ᠡᠮᠢᠶᠠᠯ᠎ᠡ᠃ ᠲᠡᠭᠡᠲᠡᠯ᠎ᠡ ᠤᠨᠴᠠᠭᠠᠢ ᠪᠠᠶᠢᠳᠠᠯ ᠡᠭᠦᠰᠴᠤ ᠡᠬᠢᠯᠡᠯ᠎ᠡ᠃ ᠦᠳᠡᠰᠢ᠂ ᠲᠤᠲᠤᠷ᠎ᠠ ᠦᠷᠭᠦᠭᠡᠨ ᠳᠤ ᠬᠡᠰᠡᠭ ᠬᠦᠮᠦᠰ ᠴᠤᠭᠯᠠᠷᠠᠵᠤ ᠶᠠᠮᠠᠷ ᠨᠢᠭᠡ ᠬᠡᠷᠡᠭ ᠤᠨ ᠲᠤᠬᠠᠢ ᠰᠢᠭᠦᠮᠵᠢᠯᠡᠯᠴᠠᠵᠤ ᠪᠠᠶᠢᠭ᠎ᠠ ᠰᠢᠭ᠋ ᠰᠤᠨᠤᠰᠳᠡᠯ᠎ᠠ᠃ ᠭᠡᠪᠡᠴᠤ ᠳᠡᠮᠡᠢ ᠤᠳᠠᠯ ᠦᠭᠡᠢ ᠶᠠᠷᠢᠯᠴᠠᠭ᠎ᠠ ᠲᠠᠰᠤᠯᠳᠠᠵᠤ ᠭᠠᠭᠴᠡ ᠳᠦᠷᠪᠡᠳᠦᠭᠡᠷ ᠠᠪᠠᠭ᠎ᠠ ᠶᠢᠨ ᠠᠯᠬᠤᠯᠠᠭᠰᠠᠭᠠᠷ ᠦᠨᠳᠦᠷ ᠳᠠᠭᠤᠨ ᠢᠶᠠᠷ᠄  ︽ᠡᠷᠲᠡ ᠦᠭᠡᠢ ᠤᠷᠤᠢ ᠦᠭᠡᠢ ᠬᠠᠷᠢᠨ ᠶᠠᠭ ᠡᠨᠡ ᠦᠶᠡᠰ ᠲᠤ — ᠡᠭᠦᠨ ᠢᠶᠠᠷ ᠦᠵᠡᠪᠡᠯ ᠶᠤᠰᠤᠲᠠᠢ ᠨᠢᠭᠡ ᠲᠡᠷᠰ ᠠᠮᠢᠲᠡᠨ  ᠳ᠋ᠠ︕︾ ᠭᠡᠵᠤ ᠬᠡᠯᠡᠬᠦ ᠰᠤᠨᠤᠰᠳᠠᠯ᠎ᠠ᠃  ᠪᠢ ᠡᠬᠢᠨ ᠳᠤ ᠪᠠᠨ ᠭᠠᠶᠢᠬᠠᠰᠢ ᠲᠦᠷᠦᠵᠤ ᠪᠠᠶᠢᠭᠰᠡᠨ ᠢᠶᠠᠨ ᠡᠨᠡ ᠦᠭᠡ ᠶᠢ ᠨᠠᠳᠠ ᠲᠠᠢ ᠬᠤᠯᠪᠤᠭᠳᠠᠮᠠᠷ ᠰᠢᠭ᠋ ᠭᠡᠵᠤ ᠰᠠᠨᠠᠩᠭᠤᠲᠡ ᠲᠤᠲᠤᠷ᠎ᠠ ᠲᠤᠩ ᠠᠮᠤᠷ ᠦᠭᠡᠢ ᠪᠤᠯᠤᠯ᠎ᠠ᠃ ᠬᠠᠭᠠᠯᠭᠠᠨ ᠤ ᠭᠠᠳᠠᠨᠠᠬᠢ ᠶᠢ ᠪᠠᠷᠠᠯᠠᠪᠠᠯ ᠬᠡᠨ ᠴᠤ ᠠᠯᠠᠭ᠎ᠠ᠃ ᠠᠷᠠᠢ ᠭᠡᠵᠤ ᠤᠷᠤᠢ ᠶᠢᠨ ᠬᠤᠭᠤᠯᠠᠨ ᠤ ᠡᠮᠦᠨ᠎ᠠ ᠤᠬᠤᠷ ᠬᠦᠴᠦ ᠴᠠᠢ ᠴᠢᠢᠯᠡᠬᠦ ᠪᠠᠷ ᠢᠷᠡᠭᠰᠡᠨ ᠳᠤ ᠪᠢ ᠰᠠᠶ᠋ᠢ ᠰᠤᠷᠠᠭᠯᠠᠬᠤ ᠵᠠᠪᠰᠢᠶᠠᠨ ᠤᠯᠵᠠᠢ᠃︽ᠰᠠᠶ᠋ᠢᠬᠠᠨ ᠳᠦᠷᠪᠡᠳᠦᠭᠡᠷ ᠠᠪᠠᠭ᠎ᠠ ᠬᠡᠨ ᠳᠤ ᠠᠭᠤᠷᠯᠠᠭᠰᠡᠨ ᠪᠤᠢ︖︾ ᠭᠡᠵᠤ ᠪᠢ ᠠᠰᠠᠭᠤᠯ᠎ᠡ᠃︽ᠰᠢᠶᠠᠩ ᠯᠢᠨ ᠪᠡᠷᠭᠡᠨ ᠠᠴᠠ ᠤᠨᠳᠤᠤ ᠬᠡᠨ ᠪᠠᠶᠢᠬᠤ ᠪᠤᠢ︖︾ ᠭᠡᠵᠤ ᠬᠦᠴᠦᠨ ᠤ ᠬᠦᠮᠦᠨ ᠳᠦᠭᠦᠮᠭᠡᠨ ᠬᠠᠷᠢᠭᠤᠯᠪᠠ᠃ ︽ᠰᠢᠶᠠᠩ ᠯᠢᠨ ᠪᠡᠷᠭᠡᠨ ᠡ︖ᠶᠠᠭᠠᠬᠢᠴᠢᠬᠠᠪᠠ︖︾ ᠭᠡᠵᠤ ᠪᠢ ᠠᠮᠵᠢᠭᠤᠯᠠᠨ ᠠᠰᠠᠭᠤᠵᠤ ᠭᠠᠷᠤᠯ᠎ᠡ᠃ ︽ᠦᠬᠦᠴᠢᠭᠡᠵᠡᠢ᠃︾ ︽ᠦᠬᠦᠴᠢᠭᠡᠵᠡᠢ ᠡ︖︾ ᠮᠢᠨᠦ ᠵᠢᠷᠦᠭᠡ ᠭᠡᠨᠡᠳᠲᠡ ᠠᠳᠬᠤᠷᠠᠵᠤ᠂ ᠪᠢ ᠪᠠᠷᠤᠭ ᠦᠰᠦᠷᠴᠤ ᠪᠤᠰᠬᠤ ᠠᠯᠳᠠᠨ ᠴᠢᠷᠠᠢ ᠴᠤ ᠪᠠᠷᠤᠭ ᠦᠩᠭᠡ ᠬᠤᠪᠢᠷᠠᠵᠠᠢ᠃ ᠬᠡᠪᠡᠴᠤ ᠲᠡᠷᠡ ᠶᠡᠷᠦ ᠲᠤᠯᠤᠭᠠᠢ ᠦᠨᠳᠡᠶᠢᠭᠰᠡᠨ ᠦᠭᠡᠢ ᠪᠤᠯᠬᠤᠷ ᠤᠭᠲᠤ ᠮᠡᠳᠡᠭᠰᠡᠨ ᠦᠭᠡᠢ᠃ ᠢᠩᠬᠢᠭᠡᠳ ᠪᠢ ᠰᠡᠳᠬᠢᠯ ᠢᠶᠠᠨ ᠲᠤᠭᠲᠠᠭᠠᠵᠤ ᠵᠠᠯᠭᠠᠭᠠᠳ᠄ ︽ᠬᠡᠵᠢᠶ᠎ᠡ ᠦᠬᠦᠭᠰᠡᠨ ᠪᠤᠢ︖︾ ︽ᠬᠡᠵᠢᠶ᠎ᠡ ᠡ︖ — ᠦᠴᠦᠭᠡᠳᠦᠷ ᠰᠦᠨᠢ᠂ ᠡᠰᠡᠭᠦᠯ᠎ᠡ ᠦᠨᠦᠳᠦᠷ ᠪᠠ᠃ ᠪᠢ ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ᠃︾ ︽ᠶᠠᠭᠠᠬᠢᠵᠤ ᠦᠭᠦᠭᠰᠡᠨ ᠪᠤᠢ︖︾ ︽ᠶᠠᠭᠠᠬᠢᠤ ᠡ︖ — ᠶᠠᠳᠠᠭᠤᠷᠠᠵᠤ ᠦᠭᠦᠭᠰᠡᠨ ᠯᠡ ᠪᠢᠵᠡ ᠳ᠋ᠠ︖︾ ᠭᠡᠵᠤ ᠲᠡᠷᠡ ᠬᠡᠨᠡᠭ ᠴᠤ ᠦᠭᠡᠢ ᠬᠠᠷᠢᠭᠤᠯᠵᠤ ᠮᠦᠨ ᠯᠡ ᠨᠡᠮ᠎ᠡ ᠶᠢ ᠦᠨᠳᠡᠶᠢᠵᠤ ᠬᠠᠷᠠᠯ ᠦᠭᠡᠢ ᠭᠠᠷᠴᠤ ᠤᠳᠪᠠ᠃ ᠬᠡᠲᠡᠯ᠎ᠡ ᠮᠢᠨᠦ ᠭᠡᠯᠮᠡᠭᠳᠡᠯ ᠬᠠᠷᠢᠨ ᠵᠠᠭᠤᠷᠠᠬᠠᠨ ᠤ ᠬᠡᠷᠡᠭ ᠳᠡᠳᠦᠢ ᠯᠡ ᠪᠤᠯᠤᠭᠠᠳ ᠡᠭᠦᠰᠦᠮᠡᠷ ᠪᠠᠶᠢᠭᠰᠡᠨ ᠶᠠᠪᠤᠳᠠᠯ ᠦᠩᠭᠡᠷᠡᠵᠤ ᠤᠳᠤᠨ ᠮᠢᠨᠦ ᠦᠪᠡᠷ ᠤᠨ ︽ᠲᠤᠲᠤᠷᠬᠠᠢ ᠬᠡᠯᠡᠵᠤ ᠬᠦᠴᠦᠷᠡᠬᠦ ᠦᠭᠡᠢ︾ ᠭᠡᠳᠡᠭ ᠪᠠ ᠲᠡᠭᠦᠨ ᠤ ︽ᠶᠠᠳᠠᠭᠤᠷᠠᠵᠤ ᠦᠭᠦᠭᠰᠡᠨ︾ ᠬᠡᠮᠡᠭᠴᠢ ᠳᠠᠶᠢᠳᠬᠤᠷᠠᠭᠤᠯᠤᠯ ᠳᠤ ᠨᠠᠶᠢᠳᠠᠮᠠᠷ ᠴᠢᠬᠤᠯᠡ ᠦᠭᠡᠢ ᠪᠤᠯᠤᠭᠰᠡᠨ ᠳᠤ ᠲᠤᠲᠤᠷ᠎ᠠ ᠠᠭᠠᠵᠢᠮ  ᠢᠶᠠᠷ ᠬᠦᠩᠭᠡᠷᠡᠵᠤ ᠲᠠᠯᠪᠢᠭᠤᠷᠠᠪᠠ᠃ ᠬᠡᠪᠡᠴᠤ ᠬᠡᠨᠡᠳᠲᠡ ᠪᠠᠰᠡ ᠪᠠᠭ᠋ᠠᠨ ᠭᠡᠮᠰᠢᠯ ᠲᠦᠷᠦᠬᠦ ᠰᠢᠤᠬᠠᠨ ᠪᠠᠶᠢᠯ᠎ᠠ᠃ ᠤᠷᠤᠢ ᠶᠢᠨ ᠬᠤᠭᠤᠯᠡ ᠦᠷᠦᠭᠳᠡᠵᠤ᠂ ᠳᠦᠷᠪᠡᠳᠦᠭᠡᠷ ᠠᠪᠠᠭ᠎ᠠ ᠲᠦᠪ ᠴᠢᠷᠠᠶᠢᠯᠠᠨ ᠪᠠᠷ᠎ᠠ ᠪᠤᠯᠵᠤ ᠰᠠᠭᠤᠨ᠎ᠠ᠃      ᠪᠢ ᠮᠦᠨ ᠰᠢᠶᠠᠩ ᠯᠢᠨ ᠪᠡᠷᠭᠡᠨ ᠤ ᠲᠤᠬᠠᠢ ᠪᠠᠭ᠋ᠠᠨ ᠰᠤᠷᠠᠭ ᠰᠤᠨᠤᠰᠬᠤ ᠬᠦᠰᠡᠯ ᠲᠠᠢ ᠪᠠᠶᠢᠵᠠᠢ᠃ ᠬᠡᠪᠡᠴᠤ ᠲᠡᠷᠡ ︽ᠴᠢᠳᠭᠦᠷ ᠰᠠᠬᠢᠭᠤᠯᠰᠤᠨ ᠬᠡᠮᠡᠭᠴᠢ ᠬᠤᠶᠠᠷ ᠬᠡᠢ ᠶᠢᠨ ᠰᠠᠶᠢᠨ ᠡᠨᠧᠷᠬᠢ ᠪᠤᠯᠠᠢ︾ ᠭᠡᠳᠡᠭ ᠢ ᠤᠩᠰᠢᠵᠤ ᠦᠩᠭᠡᠷᠡᠭᠰᠡᠨ ᠪᠤᠯᠪᠠᠴᠤ ᠲᠡᠭᠦᠨ ᠳᠤ ᠮᠦᠨ ᠲᠤᠩ ᠤᠯᠠᠨ ᠴᠡᠭᠡᠷ ᠲᠠᠢ ᠪᠠᠶᠢᠵᠤ ᠳᠠᠭᠠᠳᠬᠠᠯ ᠤᠶᠢᠷᠠᠳᠤᠭᠰᠡᠨ ᠦᠶ᠎ᠡ  ᠪᠠᠷ ᠦᠬᠦᠯ ᠮᠦᠬᠦᠯ ᠡᠪᠡᠳᠴᠢᠨ ᠳᠠᠬᠤᠯ ᠮᠡᠲᠤᠰ ᠢ ᠶᠠᠭᠠᠬᠢᠭᠰᠡᠨ ᠴᠤ ᠳᠤᠷᠠᠳᠴᠤ ᠪᠤᠯᠬᠤ ᠦᠭᠡᠢ᠂ ᠬᠠᠷᠢᠨ ᠠᠷᠭ᠎ᠠ ᠪᠤᠰᠤ ᠪᠠᠶᠢᠳᠠᠯ ᠳᠤ ᠨᠢᠭᠡᠨ ᠵᠦᠢᠯ ᠤᠨ ᠪᠢᠲᠡᠭᠦᠦ ᠦᠭᠡ ᠪᠠᠷ ᠤᠷᠤᠯᠠᠭᠤᠯᠬᠤ ᠬᠡᠷᠡᠭᠲᠡᠢ ᠭᠡᠳᠡᠭ ᠢ ᠮᠡᠳᠡᠪᠡᠴᠤ᠂ ᠬᠠᠷᠠᠮᠰᠠᠯᠲᠡᠢ ᠨᠢ ᠪᠢ ᠦᠨᠦᠬᠢ ᠦᠭᠡ ᠨᠦᠭᠦᠳ ᠢ ᠮᠡᠳᠡᠳᠡᠭ ᠦᠭᠡᠢ ᠲᠤᠯᠡ ᠤᠯᠠᠨ ᠳᠠᠬᠢᠨ ᠭᠤᠷᠢᠯᠠᠭᠰᠡᠨ ᠪᠤᠯᠪᠠᠴᠤ ᠡᠴᠦᠰ ᠲᠤ ᠪᠠᠨ ᠬᠠᠰᠢ ᠯᠡ ᠰᠠᠨᠠᠭ᠎ᠠ ᠪᠠᠨ ᠬᠤᠷᠢᠶᠠᠯ᠎ᠠ᠃ ᠪᠢ ᠬᠡᠨᠡᠳᠲᠡ ᠲᠡᠭᠦᠨ ᠤ ᠲᠦᠪᠯᠡᠭᠦᠨ ᠴᠢᠷᠠᠢ ᠳᠡᠭᠡᠷ᠎ᠡ  ᠠᠴᠠ ᠲᠡᠭᠦᠨ ᠢ ᠨᠠᠮ᠎ᠡ ᠶᠢ ᠡᠷᠲᠡ ᠦᠭᠡᠢ ᠤᠷᠤᠢ ᠦᠭᠡᠢ ᠶᠠᠭ ᠡᠨᠡ ᠦᠶ᠎ᠡ ᠪᠠᠷ ᠢᠷᠡᠵᠤ ᠲᠡᠭᠦᠨ ᠢ ᠵᠤᠪᠠᠭᠠᠵᠤ ᠪᠠᠶᠢᠭ᠎ᠠ ᠴᠢᠨᠢ ᠮᠦᠨ ᠴᠤ ᠨᠢᠭᠡ ᠵᠦᠢᠯ ᠤᠨ ᠲᠡᠷᠰ ᠠᠮᠢᠲᠡᠨ ᠰᠠᠨ ᠭᠡᠵᠤ ᠪᠤᠳᠤᠵᠤ ᠪᠠᠶᠢᠯᠭᠤᠢ ᠭᠡᠵᠤ ᠰᠡᠵᠢᠭ ᠲᠦᠷᠦᠭᠡᠳ᠂ ᠮᠠᠷᠭᠠᠰᠢ ᠳᠤ ᠪᠠᠨ ᠯᠤ᠋ ᠪᠠᠯᠭᠠᠰᠤᠨ ᠠᠴᠠ ᠰᠠᠯᠵᠤ ᠬᠤᠲᠠ ᠤᠷᠤᠨ᠎ᠠ ᠭᠡᠵᠤ ᠳᠠᠷᠤᠶᠢᠬᠠᠨ ᠬᠡᠯᠡᠵᠤ ᠲᠡᠭᠦᠨ ᠤ ᠰᠡᠳᠬᠢᠯ ᠢ ᠡᠷᠲᠡᠬᠡᠨ ᠲᠠᠶᠢᠪᠤᠰᠢᠷᠠᠭᠤᠯᠵᠤ ᠲᠠᠯᠪᠢᠯ᠎ᠠ᠃ ᠲᠡᠷᠡ ᠴᠤ ᠨᠠᠮ᠎ᠡ ᠶᠢ ᠰᠠᠭᠤᠵᠤ ᠪᠠᠢ ᠭᠡᠵᠤ ᠳᠡᠮᠡᠢ ᠱᠠᠯᠠᠭᠰᠡᠨ ᠦᠭᠡᠢ᠃ ᠨᠢᠭᠡ ᠴᠠᠭ ᠤᠨ ᠬᠤᠭᠤᠯᠡ ᠶᠢ ᠢᠩᠬᠢᠵᠤ ᠬᠦᠷ ᠨᠠᠶᠢᠷ ᠦᠭᠡᠢ ᠢᠳᠡᠵᠤ ᠭᠠᠷᠴᠠᠢ᠃  ᠡᠪᠤᠯ  ᠤᠨ ᠡᠳᠦᠷ ᠪᠤᠭᠤᠨᠢᠬᠠᠨ᠂ ᠲᠡᠭᠡᠭᠡᠳ ᠪᠠᠰᠡ ᠴᠠᠰᠤᠲᠠᠢ ᠪᠤᠯᠬᠤᠷ᠂ ᠦᠳᠡᠰᠢ ᠶᠢᠨ ᠪᠦᠷᠦᠢ ᠬᠡᠵᠢᠶᠠᠨ ᠤ ᠪᠦᠬᠦ ᠪᠠᠯᠭᠠᠰᠤ ᠶᠢ ᠪᠦᠷᠬᠦᠵᠠᠢ᠃ ᠬᠦᠮᠦᠰ ᠪᠦᠷ ᠳ᠋ᠧᠩ ᠤᠨ ᠳᠤᠤᠷ᠎ᠠ ᠮᠤᠩᠭᠠᠨᠢᠪᠠᠴᠤ ᠴᠤᠩᠬᠤᠨ ᠭᠠᠳᠠᠨ᠎ᠠ ᠬᠠᠷᠢᠨ ᠲᠤᠩ ᠨᠠᠮᠵᠢᠭᠤᠨ ᠪᠠᠶᠢᠯ᠎ᠠ᠃ ᠵᠤᠪ ᠵᠤᠵᠠᠭᠠᠨ ᠬᠤᠷᠠᠭᠰᠡᠨ ᠴᠠᠰᠤᠨ ᠳᠡᠪᠢᠰᠭᠡᠷ ᠳᠡᠭᠡᠷ᠎ᠡ ᠴᠠᠰᠤ ᠯᠠᠪᠰᠠᠯᠠᠨ ᠪᠠᠭᠤᠬᠤ ᠳᠤ ᠱᠠᠷᠴᠢᠬᠢᠨᠠᠬᠤ ᠰᠢᠭ᠋ ᠳᠤᠭᠤᠯᠳᠠᠬᠤᠯᠠᠷ ᠬᠦᠮᠦᠰ ᠲᠤ ᠤᠯᠠᠮ ᠤᠶᠢᠳᠬᠠᠷᠯᠢᠭ ᠨᠠᠮᠵᠢᠭᠤᠨ ᠰᠠᠨᠠᠭᠳᠠᠭᠤᠯᠤᠨ᠎ᠠ᠃       ᠪᠢ ᠰᠢᠷᠠᠩᠭᠤᠢ ᠬᠡᠷᠡᠯ ᠰᠠᠴᠤᠷᠠᠭᠤᠯᠤᠭᠰᠡᠨ ᠯᠤᠤᠯᠢᠨ ᠲᠤᠰᠤᠨ ᠳ᠋ᠧᠩ ᠤᠨ ᠳᠡᠷᠭᠡᠳᠡ ᠭᠠᠭᠴᠡ ᠪᠠᠷ ᠰᠠᠭᠤᠵᠤ᠂ ᠬᠦᠮᠦᠰ ᠲᠤ ᠲᠤᠭᠤᠰᠤ ᠰᠢᠷᠠᠯᠵᠢ ᠶᠢᠨ ᠤᠪᠤᠭᠠᠨ ᠳᠤ ᠬᠠᠶᠠᠭᠳᠠᠭᠰᠡᠨ᠂ ᠬᠠᠷᠠᠭᠰᠠᠭᠠᠷ ᠪᠠᠶᠢᠭᠠᠳ ᠤᠯᠢᠭ ᠠᠯᠳᠠᠭᠤᠯᠤᠭᠰᠡᠨ ᠬᠠᠭᠤᠴᠢᠨ ᠲᠤᠭᠯᠠᠭᠠᠮ ᠤᠨ ᠡᠳ᠋᠂ ᠤᠷᠢᠳ ᠲᠤ ᠪᠠᠨ ᠪᠠᠰᠡ ᠲᠤᠭᠤᠰᠤ ᠰᠢᠷᠠᠯᠵᠢᠨ ᠳᠤ ᠳᠦᠷᠢ ᠳᠦᠷᠬᠦ ᠪᠠᠨ ᠢᠯᠡᠷᠡᠭᠦᠯᠦᠭᠡᠳ ᠰᠤᠨᠢ ᠲᠠᠢ ᠠᠮᠢᠳᠤᠷᠠᠭᠰᠡᠳ ᠤᠨ ᠨᠢᠳᠦᠨ ᠳᠤ ᠶᠠᠭᠤᠨ ᠳᠤ ᠪᠠᠰᠡ ᠲᠡᠭᠡᠵᠤ ᠠᠮᠢᠳᠤᠷᠠᠭᠠᠳ ᠪᠠᠶᠢᠳᠠᠭ ᠪᠤᠢ ᠭᠡᠵᠤ ᠭᠠᠶᠢᠬᠠᠭᠳᠠᠵᠤ ᠡᠭᠳᠡᠭᠦᠴᠡᠭᠳᠡᠵᠤ ᠬᠠᠷᠠᠭᠳᠠᠵᠤ ᠪᠠᠶᠢᠭᠰᠡᠨ ᠲᠦᠮᠡᠨ ᠲᠦᠰᠢᠭ  ᠢᠶᠠᠨ ᠠᠯᠳᠠᠭᠰᠡᠨ ᠰᠢᠶᠠᠩ ᠯᠢᠨ ᠪᠡᠷᠭᠡᠨ ᠤᠳᠤ ᠶᠠᠭᠤ ᠴᠤ ᠭᠡᠰᠡᠨ ᠡᠷᠯᠢᠭ ᠤᠨ ᠡᠯᠴᠢ ᠳᠤ ᠴᠡᠪ ᠴᠡᠪᠡᠷ ᠱᠦᠭᠦᠷᠳᠡᠭᠳᠡᠵᠡᠢ ᠭᠡᠵᠤ ᠪᠤᠳᠤᠯᠭᠠᠰᠢᠷᠠᠯ᠎ᠠ᠃ ᠰᠦᠭ ᠰᠦᠨᠡᠰᠦ ᠪᠠᠶᠢᠳᠠᠭ ᠡᠰᠡ ᠬᠦ ᠶᠢ ᠪᠢ ᠮᠡᠳᠡᠬᠦ ᠦᠭᠡᠢ᠃ ᠬᠡᠪᠡᠴᠤ ᠪᠤᠳᠠᠲᠤ ᠶᠢᠷᠲᠢᠨᠴᠤ ᠳᠤ᠂ ᠠᠷᠭᠠᠴᠠᠭ᠎ᠠ ᠦᠭᠡᠢ ᠨᠢ ᠡᠰᠡ ᠠᠮᠢᠳᠤᠷᠠᠵᠤ᠂ ᠦᠵᠡᠨ ᠶᠠᠳᠠᠭᠰᠡᠳ ᠲᠤ ᠦᠯᠦ ᠬᠠᠷᠠᠭᠳᠠᠪᠠᠯ᠂ ᠬᠡᠨ ᠠᠯᠢᠨ ᠳᠤ ᠪᠠᠨ ᠴᠤ ᠪᠦᠷ ᠳᠡᠭᠡᠷ᠎ᠡ ᠠᠵᠠᠢ᠃ ᠴᠤᠩᠬᠤᠨ ᠭᠠᠳᠠᠨᠠᠬᠢ ᠱᠠᠷᠴᠢᠬᠢᠨᠠᠬᠤ ᠰᠢᠭ᠋ ᠳᠤᠭᠤᠯᠳᠠᠬᠤ ᠴᠠᠰᠤᠨ ᠴᠠᠴᠡᠭ ᠢ ᠴᠢᠮᠡᠭᠡ ᠦᠭᠡᠢ ᠴᠢᠩᠨᠠᠵᠤ ᠡᠳᠡᠭᠡᠷ ᠢ ᠪᠤᠳᠤᠯᠬᠢᠯᠠᠵᠤ ᠰᠠᠭᠤᠬᠤ ᠳᠤ ᠭᠡᠳᠡᠷᠬᠦ ᠬᠠᠷᠢᠨ ᠠᠭᠠᠵᠢᠮ ᠢᠶᠠᠷ ᠠᠭᠤᠵᠢᠷᠠᠵᠤ ᠢᠷᠡᠯ᠎ᠡ᠃  ᠲᠡᠭᠡᠬᠦ ᠳᠤ ᠤᠷᠢᠳᠦᠬᠢ ᠦᠵᠡᠭᠳᠡᠵᠤ ᠰᠤᠨᠤᠰᠳᠡᠵᠤ ᠪᠠᠶᠢᠭᠰᠡᠨ ᠲᠡᠭᠦᠨ ᠤ ᠬᠠᠭᠠᠰ ᠨᠠᠰᠤᠨ ᠤ ᠦᠢᠯᠡ ᠶᠠᠪᠤᠳᠠᠯ ᠤᠨ ᠲᠠᠰᠤᠷᠬᠠᠢ ᠤᠭᠴᠤᠷᠬᠠᠢ ᠵᠦᠢᠯᠡᠰ ᠤᠳᠤ ᠬᠠᠷᠢᠨ ᠤᠶᠠᠯᠳᠤᠵᠤ ᠨᠡᠶᠢᠯᠡᠭᠡᠳ ᠨᠢᠭᠡ ᠴᠤᠭᠴᠡ ᠪᠤᠯᠤᠭᠰᠡᠨ ᠪᠠᠶᠢᠯ᠎ᠠ᠃  
 
ᠢᠷᠡᠯᠲᠡ᠄ ᠬᠤᠯᠪᠣᠭ᠎ᠠ ᠰᠦᠯᠵᠢᠶ᠎ᠡ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号