ᠲᠡᠷᠢᠭᠦᠨ ᠬᠠᠭᠤᠳᠠᠰᠤ
ᠲᠣᠶᠢᠮᠣ ᠪᠠᠶᠢᠳᠠᠯ
ᠰᠣᠨᠢᠨ ᠮᠡᠳᠡᠭᠡ
ᠢᠯᠡ ᠵᠠᠰᠠᠭ
ᠦᠢᠯᠡᠴᠢᠯᠡᠭᠡ
ᠰᠣᠶᠣᠯ ᠡᠷᠳᠡᠨᠢ
ᠵᠢᠷᠭᠠᠯ ᠤᠨ ᠡᠷᠢᠯ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2018/12/6
     ᠬᠤᠰᠢᠭᠤᠨ ᠳᠤ ᠤᠴᠢᠭᠠᠳ ᠭᠠᠨᠳᠢᠭ ᠰᠡᠷᠮᠡᠭᠦᠨ ᠡᠷ᠎ᠡ ᠡᠮ᠎ᠡ ᠬᠤᠶᠠᠷ ᠲᠠᠢ ᠤᠴᠠᠷᠠᠭᠰᠠᠨ ᠠᠴᠠ ᠬᠤᠶᠢᠰᠢ ᠬᠤᠳᠠ ᠤᠷᠤᠵᠦ ᠠᠮᠢᠳᠤᠷᠠᠬᠤ ᠬᠦᠰᠡᠯ ᠮᠢᠨᠢ ᠤᠯᠠᠮ ᠳᠡᠭᠡᠷᠡᠳᠡᠪᠡ᠃              ᠬᠦᠮᠦᠨ ᠤ ᠲᠡᠷᠡ ᠬᠤᠶᠠᠷ ᠢ ᠦᠵᠡᠯ ᠳ᠋ᠠ᠂ ᠡᠮᠤᠰᠴᠦ ᠵᠡᠭᠦᠵᠦ ᠶᠠᠪᠤᠵᠦ ᠰᠠᠭᠤᠵᠦ ᠪᠠᠶᠢᠬᠤ ᠨᠢ ᠬᠤᠳᠠ ᠶᠢᠨ ᠬᠦᠮᠦᠨ ᠲᠠᠢ ᠦᠭᠡᠷ᠎ᠡ ᠨᠢ ᠶᠠᠭᠤ ᠪᠤᠢ︖ ᠲᠡᠷᠡ ᠰᠡᠷᠮᠡᠭᠦᠨ ᠬᠦᠳᠡᠭᠡ ᠪᠠᠶᠢᠬᠤ ᠳᠠᠭᠠᠨ ᠡᠷᠡᠰ ᠤᠨ ᠨᠢᠳᠦᠨ ᠳᠤ ᠦᠷᠲᠦᠮᠡᠷ ᠦᠬᠡᠢ ᠪᠦᠷᠦᠭᠬᠡᠨ ᠠᠮᠢᠳᠠᠨ ᠪᠠᠶᠢᠭᠰᠠᠨ ᠶᠤᠮ᠃ ᠬᠠᠭᠠᠰᠬᠠᠨ ᠵᠢᠯ ᠤᠨ ᠬᠤᠭᠤᠷᠤᠨᠳᠤ ᠦᠭᠡᠷ᠎ᠡ ᠨᠢᠭᠡ ᠬᠦᠮᠦᠨ ᠪᠤᠯᠵᠦ ᠬᠤᠪᠢᠷᠠᠭᠠᠳ ᠭᠠᠨᠳᠢᠭ ᠲᠠᠢ ᠬᠠᠮᠳᠤ ᠪᠠᠶᠢᠭᠰᠠᠨ ᠦᠭᠡᠢ ᠪᠤᠯ ᠲᠠᠨᠢ ᠶᠠᠳᠠᠮᠠᠷ ᠭᠠᠨᠭ᠍ᠭᠠᠡᠭ ᠳᠡᠭᠵᠢᠨ ᠪᠤᠯᠤᠭᠰᠠᠨ ᠢ ᠶᠠᠭᠠᠬᠢᠨ᠎ᠠ᠃ ᠮᠢᠨᠤ ᠬᠦᠭᠡᠷᠦᠬᠦᠨ ᠪᠤᠷᠤ ᠬᠤᠳᠠ ᠳᠤ ᠠᠮᠢᠳᠤᠷᠠᠬᠤ ᠶᠤᠮ ᠪᠤᠯ ᠰᠡᠷᠮᠡᠭᠦᠨ ᠢ ᠳᠠᠭᠠᠭᠤᠯᠬᠤ ᠶᠤᠮ ᠪᠢᠰᠢ᠂ ᠶᠤᠰᠤᠲᠡᠢ ᠬᠤᠳᠠ ᠶᠢᠨ ᠬᠡᠤᠬᠡᠨᠴᠤᠤᠯ ᠢ ᠠᠳᠠᠭᠠᠷᠬᠠᠭᠤᠯᠮᠠᠷ ᠭᠤᠶᠤ ᠠᠮᠢᠳᠠᠨ ᠪᠤᠯᠤᠨ᠎ᠠ᠃ ᠵᠠ᠂ ᠳᠡᠭᠡᠭᠡᠳ ᠯᠠ ᠬᠠᠶᠠ ᠨᠢᠭᠡ ᠨᠤᠳᠤᠭ ᠲᠠᠭᠠᠨ ᠢᠷᠡᠬᠦ ᠳᠤ ᠠᠶᠢᠯ ᠠᠶᠢᠮᠠᠭ ᠤᠨ ᠬᠢᠨᠢ ᠪᠢᠳᠡᠨ ᠢ ᠬᠠᠷᠠᠭᠠᠳ ᠱᠤᠬᠤᠷᠬᠠᠨ ᠱᠠᠭᠰᠢᠵᠦ ᠭᠠᠷᠤᠨ᠎ᠠ ᠳ᠋ᠠ᠃ ᠪᠢᠲᠡᠭᠦᠮᠵᠢᠯᠡᠨ᠎ᠡ ᠭᠡᠳᠡᠯ᠎ᠡ ᠬᠠᠰᠢᠶᠠᠯᠠᠨ᠎ᠠ ᠭᠡᠳ ᠳᠡᠩᠰᠡᠯᠭᠡᠭᠡᠳ ᠪᠤᠯᠬᠤ ᠦᠭᠡᠢ ᠶᠤᠮ ᠴᠢᠨᠢ ᠪᠡᠯᠴᠢᠭᠡᠷ ᠬᠠᠳᠤᠯᠠᠩ ᠢᠶᠠᠨ ᠭᠡᠷ ᠬᠤᠷᠤᠭ᠎ᠠ ᠲᠠᠢ ᠪᠠᠨ ᠲᠦᠷᠢᠶᠡᠰᠦᠯᠡᠭᠦᠯᠴᠢᠬᠡᠶ᠎ᠡ᠃ ᠮᠠᠯ ᠢᠶᠠᠨ ᠪᠦᠬᠦᠨ ᠢ ᠵᠠᠷᠤᠴᠢᠬᠠᠪᠠᠯ ᠠᠰᠠᠷ ᠠᠪᠴᠢᠬᠠᠨ᠎ᠠ᠃ ᠲᠦᠷᠢᠶᠡᠰᠦᠨ ᠮᠦᠡᠭᠭᠦᠨ ᠳᠡᠭᠡᠷ᠎ᠡ ᠨᠤᠳᠤᠭ ᠪᠡᠯᠴᠢᠭᠡᠷ ᠤᠨ ᠨᠦᠬᠦᠪᠦᠷᠢ ᠡᠨᠡ ᠲᠡᠷᠡ ᠪᠠᠨ ᠨᠡᠮᠡᠪᠡᠯ ᠠᠮᠢᠨ ᠵᠢᠭᠤᠯᠭ᠎ᠠ ᠳᠤ ᠠᠯᠵᠠᠬᠤ ᠦᠭᠡᠢ᠃ ᠳᠡᠭᠡᠷ᠎ᠡ ᠠᠴᠠ ᠨᠢ ᠪᠠᠰᠠ ᠪᠠᠭ᠋ᠠᠨ ᠬᠦᠯᠦᠰᠤᠨ ᠠᠵᠢᠯ ᠬᠢᠪᠡᠯ ᠬᠦᠮᠦᠨ ᠠᠴᠠ ᠳᠤᠤᠷ᠎ᠠ ᠦᠭᠡᠢ ᠠᠮᠢᠳᠤᠷᠠᠴᠢᠬᠠᠨ᠎ᠠ᠃              ᠬᠤᠳᠠ ᠳᠤ ᠨᠡᠭᠦᠶ᠎ᠡ ᠭᠡᠬᠦ ᠰᠠᠨᠠᠭ᠎ᠠ ᠪᠠᠨ ᠭᠡᠷᠭᠡᠢ ᠳᠡᠭᠡᠨ ᠰᠢᠭᠤᠳ ᠬᠡᠯᠡᠪᠡᠯ ᠯᠠᠪ ᠵᠦᠪᠰᠢᠶᠡᠷᠡᠬᠦ ᠦᠭᠡᠢ᠃ ᠬᠦᠭᠰᠢᠨ ᠦᠨᠢᠶᠡᠳ ᠢ ᠨᠢ ᠬᠤᠳᠠᠯᠳᠤᠬᠤ ᠬᠡᠬᠦ ᠳᠤ ᠨᠢ ᠦᠭ ᠶᠠᠳᠠᠭᠠᠳ ᠤᠬᠢᠯᠠᠭᠠᠨ ᠤᠨᠵᠢᠭᠠᠨ ᠪᠤᠯᠳᠠᠭ ᠬᠦᠮᠦᠨ ᠲᠡᠷᠡ ᠤᠯᠠᠨ ᠠᠮᠢᠨ ᠬᠠᠶᠢᠷ᠎ᠠ ᠲᠠᠢ ᠮᠠᠯ ᠠᠴᠠ ᠨᠢ ᠪᠠᠷᠢᠨ ᠠᠯᠪᠠ ᠪᠠᠷ ᠰᠠᠯᠭᠠᠨ᠎ᠠ ᠭᠡᠪᠡᠯ ᠬᠡᠢ ᠰᠤᠯᠢᠶ᠎ᠠ ᠤᠷᠤᠵᠦ ᠮᠡᠳᠡᠨ᠎ᠡ᠃ ᠤ᠂ ᠮᠡᠳᠡᠯ᠎ᠡ᠂ ᠪᠠᠭ᠎ᠠ ᠶᠢᠨ ᠨᠠᠶᠢᠵᠠ ᠦᠷᠨᠢᠩᠭᠦᠢ ᠬᠤᠳᠠ ᠳᠤ ᠳᠤᠮᠤ ᠠᠵᠦ ᠠᠬᠤᠶᠢᠯᠠᠯᠳᠠᠨ ᠪᠤᠯᠤᠭᠠᠳ ᠰᠡᠩᠭᠢᠨᠡᠭᠦᠯᠵᠦ ᠶᠠᠪᠤᠭ᠎ᠠ ᠪᠢᠰᠢᠤ︖ ᠨᠠᠮᠠᠢᠢ ᠢᠷ᠎ᠡ ᠡ ᠭᠡᠳ ᠵᠠᠯᠠᠭᠠᠳ ᠯᠠ ᠪᠠᠶᠢᠳᠠᠭ ᠶᠤᠮ᠃ ᠤᠳᠤ ᠬᠠᠷᠢᠨ ᠳᠡᠭᠦᠨ  ᠤ ᠪᠠᠨ ᠢᠳᠡ ᠶᠢ ᠭᠠᠷᠭᠠᠬᠤ ᠴᠠᠭ ᠪᠤᠯᠤᠭᠰᠠᠨ ᠶᠤᠮ ᠪᠠᠶᠢᠨ᠎ᠠ᠃ ᠤᠷᠢᠳᠠ ᠪᠠᠷ ᠲᠡᠭᠦᠨ ᠤ ᠺᠤᠮᠫᠠᠨᠢ ᠳᠤ ᠬᠦᠯ ᠳᠤᠭᠳᠠᠵᠦ ᠪᠠᠶᠢᠭᠠᠳ ᠠᠭᠠᠵᠢᠭᠤ ᠪᠠᠷ ᠬᠡᠷᠭᠡᠢ ᠪᠠᠨ ᠤᠬᠠᠭᠠᠯᠠᠶ᠎ᠠ᠃ ᠠᠪᠤ ᠡᠵᠢ ᠬᠤᠶᠠᠷ ᠮᠢᠨᠢ ᠴᠦ ᠠᠶᠠᠨᠳᠠᠭᠠᠨ ᠪᠢᠳᠡ ᠬᠤᠶᠠᠷ ᠲᠠᠢ ᠬᠠᠮᠳᠤ ᠬᠤᠳᠠ ᠳᠤ ᠨᠡᠭᠦᠵᠦ ᠡᠳ᠋ᠯᠡᠭᠡᠳᠦᠢ ᠵᠢᠷᠭᠠᠯ ᠢ ᠡᠳ᠋ᠯᠡᠨ᠎ᠡ ᠳ᠋ᠠ᠃ ᠭᠠᠨᠳᠢᠭ ᠴᠢ ᠬᠤᠰᠢᠭᠤ ᠪᠠᠯᠭᠠᠰᠤᠨ ᠳᠤ ᠤᠷᠤᠴᠢᠬᠠᠭᠠᠳ ᠰᠡᠩᠬᠡᠯᠵᠡᠨ᠎ᠡ ᠬᠡᠬᠦ ᠳᠤ ᠡᠨᠡ ᠠᠬ᠎ᠠ ᠨᠢ ᠠᠶᠢᠮᠠᠭ ᠤᠨ ᠬᠤᠳᠠ ᠳᠤ ᠰᠠᠭᠤᠷᠢᠰᠢᠭᠠᠳ ᠦᠵᠡᠭᠦᠯᠦᠨ᠎ᠡ ᠳ᠋ᠠ ᠭᠡᠵᠦ ᠬᠦᠮᠦᠬᠡᠢ ᠵᠠᠭᠤᠯ᠎ᠠ᠃            ᠨᠤᠳᠤᠭ ᠤᠨ ᠢᠶᠠᠨ ᠤᠪᠤᠭᠠᠨ ᠳᠠᠬᠢᠯᠭ᠎ᠠ ᠶᠢᠨ ᠨᠠᠶᠢᠷ ᠲᠤ ᠬᠡᠷᠭᠡᠢ ᠪᠠᠨ ᠳᠠᠭᠠᠭᠤᠯᠤᠭᠠᠳ ᠬᠠᠷᠢᠬᠤ ᠳᠤ ᠪᠦᠬᠡ ᠦᠵᠡᠵᠦ ᠪᠠᠶᠢᠭᠰᠠᠨ ᠬᠦᠮᠦᠰ ᠪᠢᠳᠡ ᠬᠤᠶᠠᠷ ᠢ ᠬᠦᠷᠢᠶᠡᠯᠡᠨ ᠠᠪᠴᠤ ᠳᠡᠪᠡᠷᠢᠬᠦ ᠨᠢ ᠳᠡᠪᠡᠷᠢᠵᠦ᠂ ᠭᠠᠷ ᠠᠴᠠ ᠠᠳᠬᠤᠬᠤ ᠨᠢ ᠠᠳᠬᠤᠵᠦ᠂ ᠪᠦᠰᠡᠭᠦᠶᠢᠴᠤᠤᠯ ᠨᠢ ᠬᠡᠷᠭᠡᠢ ᠶᠢ ᠮᠢᠨᠢ ᠪᠤᠤᠷᠯᠠᠵᠦ ︽ᠶᠠᠭᠠᠬᠢᠭᠰᠠᠨ ᠭᠤᠶᠤ ᠪᠤᠯᠴᠢᠬᠠᠭᠰᠠᠨ ᠶᠤᠮ ᠪᠤᠢ︖︾ ᠭᠡᠵᠦ ᠳᠠᠭᠤ ᠠᠯᠳᠠᠵᠠᠭᠠᠨ᠎ᠠ᠃ ᠬᠡᠷᠭᠡᠢ ᠶᠢᠨ ᠢᠶᠠᠨ ᠭᠤᠶᠤ ᠶᠢ ᠬᠡᠯᠡᠬᠦ ᠶᠤᠮ ᠪᠤᠯ ᠠᠷᠪᠠᠨ ᠵᠢᠯ ᠤᠨ ᠡᠮᠤᠨᠡᠬᠢ ᠬᠤᠷᠢᠮᠯᠠᠬᠤ ᠦᠶ᠎ᠡ ᠶᠢᠨ ᠠᠴᠠ ᠪᠠᠨ ᠬᠤᠪᠢ ᠳᠠᠭᠢᠨ ᠰᠠᠶᠢᠬᠠᠨ ᠬᠠᠷᠠᠭᠳᠠᠵᠦ ᠶᠤᠰᠤᠳᠠᠢ ᠺᠢᠨᠤ᠋ ᠳᠤᠭᠯᠠᠭᠴᠢ ᠴᠦ ᠶᠤᠮ ᠤᠤ ᠪᠦᠷ ᠦᠨᠤ ᠳᠠᠭᠢᠨᠢ ᠭᠡᠳᠡᠭ ᠨᠢ ᠰᠢᠭ ᠬᠠᠷᠠᠭᠳᠠᠬᠤ ᠶᠢ ᠶᠠᠭᠠᠬᠢᠨ᠎ᠠ᠃ ︽ᠬᠦᠢ᠂ ᠭᠠᠳᠠᠨ᠎ᠠ ᠶᠠᠭᠤᠨ ᠤ ᠨᠤᠬᠠᠢ ᠬᠤᠷᠭᠤᠭᠠᠳ ᠪᠠᠶᠢᠨ᠎ᠠ ᠪᠤᠢ︖︾ ᠭᠡᠬᠦ ᠬᠡᠷᠭᠡᠢ ᠶᠢᠨ ᠳᠠᠭᠤᠨ ᠢᠶᠠᠷ ᠲᠦᠭᠡᠷᠢᠭᠰᠡᠨ ᠪᠤᠳᠤᠯ ᠠᠴᠠ ᠪᠠᠨ ᠰᠠᠯᠤᠭᠰᠠᠨ ᠴᠦ ︽ᠤᠳᠠᠯ ᠦᠭᠡᠢ ᠦᠨᠡᠨ ᠪᠤᠯᠭᠠᠨ᠎ᠠ︾ ᠭᠡᠵᠦ ᠪᠢᠳᠡᠭᠦᠤ ᠳᠡᠭᠡᠨ ᠠᠨᠳᠠᠭᠠᠶᠢᠯᠠᠵᠦ ᠬᠠᠭᠠᠯᠭ᠎ᠠ ᠲᠦᠯᠬᠢᠪᠡ᠃              ᠦᠷᠨᠢᠩᠭᠦᠢ ᠶᠢᠨ ᠺᠤᠮᠫᠠᠨᠢ ᠳᠤ ᠤᠷᠤᠬᠤ ᠳᠤ ᠦᠨᠤ ᠺᠢᠨᠤ᠋ ᠶᠢᠨ ᠦᠵᠡᠭᠳᠡᠯ ᠳᠤ ᠤᠷᠤᠭᠰᠠᠨ ᠶᠤᠮ ᠰᠢᠭ᠋᠃ ᠡᠭᠦᠳᠡᠨ ᠬᠠᠷᠠᠭᠤᠯ ᠨᠢ ᠨᠠᠷᠢᠨ ᠪᠢᠴᠢᠭᠡᠴᠢ ᠳᠤ᠂ ᠨᠠᠷᠢᠨ ᠪᠢᠴᠢᠭᠡᠴᠢ ᠨᠢ ᠡᠷᠬᠢᠯᠡᠭᠴᠢ ᠳᠤ᠂ ᠡᠷᠬᠢᠯᠡᠭᠴᠢ ᠨᠢ ᠡᠵᠡᠨᠳᠡᠨ  ᠳᠤ ᠪᠠᠨ ᠪᠠᠭ᠋ᠠᠨ ᠤᠲᠠᠰᠤᠳᠤᠭᠠᠳ ᠨᠠᠷᠢᠨ ᠪᠢᠴᠢᠭᠡᠴᠢ ᠶᠢᠨ ᠳᠠᠭᠠᠭᠤᠯᠭ᠎ᠠ ᠪᠠᠷ ᠡᠵᠡᠨᠳᠡᠨ ᠤ ᠬᠢᠨᠢ ᠠᠯᠪᠠᠨ ᠭᠡᠷ ᠲᠤ ᠤᠷᠤᠯ᠎ᠠ᠃ ᠭᠠᠴᠠᠭᠠᠨ ᠤ ᠰᠤᠶᠤᠯ ᠤᠨ ᠭᠡᠷ ᠠᠴᠠ ᠳᠠᠬᠢᠨ ᠠᠭᠤᠵᠢᠭᠤ ᠳᠤᠮᠤ ᠦᠷᠦᠭᠡᠨ ᠤ ᠭᠤᠤᠯ ᠳᠤᠮᠳᠠᠬᠢ ᠮᠤᠩᠭᠤᠯ ᠭᠡᠷ ᠤᠨ ᠰᠠᠭᠤᠷᠢ ᠠᠴᠠ ᠲᠤᠮᠤ ᠵᠠᠢ ᠡᠵᠡᠯᠡᠭᠰᠡᠨ ᠰᠢᠷᠡᠭᠡᠨ ᠤ ᠴᠠᠭᠠᠨ᠎ᠠ ᠦᠷᠨᠢᠩᠭᠦᠢ ᠮᠢᠨᠤ ᠤᠷᠤᠭᠰᠠᠨ ᠢ ᠤᠪᠠᠶᠢᠯᠠᠭᠰᠠᠨ ᠴᠦ ᠦᠭᠡᠢ ᠪᠠᠷ ᠤᠳᠠᠰᠤ ᠪᠠᠷ ᠶᠠᠷᠢᠵᠦ ᠪᠠᠶᠢᠭ᠎ᠠ ᠴᠠᠭᠠᠳᠤᠬᠢ ᠳᠤ ᠪᠠᠨ ᠤᠴᠠᠭᠠᠷᠯᠠᠨ ᠵᠠᠩᠨᠠᠵᠦ ᠪᠠᠶᠢᠯ᠎ᠠ᠃ ᠬᠡᠵᠢᠶᠡᠳᠡ ᠳᠠᠶᠢᠪᠤᠡᠭ ᠳᠦᠯᠬᠡᠬᠡᠨ ᠢᠨᠢᠶᠡᠮᠰᠦᠭᠯᠡᠵᠦ ᠪᠠᠶᠢᠳᠠᠭ ᠲᠡᠷᠡ ᠮᠠᠨᠢ᠄ ︽ᠴᠢ ᠨᠠᠳᠠᠳᠤ ᠮᠦᠡᠭᠭᠦ ᠦᠷᠢᠳᠦᠴᠢᠭᠡᠭᠡᠳ ᠪᠤᠴᠠᠭᠠᠳ ᠨᠠᠳᠠᠳᠤ ᠠᠪᠤ ᠪᠤᠯᠬᠤ ᠨᠢ ᠤᠤ︖︾ ᠭᠡᠵᠦ ᠬᠦᠮᠦᠰᠭᠡ ᠵᠠᠩᠭᠢᠳᠤᠨ ᠬᠡᠭᠵᠢᠭᠦᠷᠬᠡᠬᠡᠳ ᠤᠳᠠᠰᠤ ᠪᠠᠨ ᠳᠠᠰ ᠨᠢᠰ ᠲᠠᠯᠪᠢᠭᠰᠠᠨ ᠢᠶᠠᠨ ᠰᠠᠢᠢ ᠮᠢᠨᠤ ᠦᠭᠡᠳᠡ ᠬᠠᠷᠠᠯ᠎ᠠ᠃ ︽ᠤᠨᠠᠭᠠᠨ ᠨᠠᠶᠢᠵᠢ ᠮᠢᠨᠢ ᠢᠷᠡᠭᠰᠡᠨ ᠰᠠᠶᠢᠨ ᠪᠤᠯᠤᠯ᠎ᠠ᠃ ᠡᠳᠦᠷᠵᠢᠨ ᠦᠷᠢ ᠨᠡᠭᠡᠬᠦ ᠦᠭᠡᠢ ᠪᠤᠯ ᠦᠷᠢ ᠨᠡᠬᠡᠭᠦᠯᠦᠭᠡᠳ ᠪᠠᠷᠠᠬᠤ ᠶᠤᠮ ᠪᠢᠰᠢ᠃ ᠳᠤᠳᠤᠷ᠎ᠠ ᠪᠠᠴᠢᠭᠤᠳᠠᠭᠠᠳ ᠳᠡᠯᠪᠡᠷᠡᠮᠡᠷ ᠪᠠᠶᠢᠨ᠎ᠠ᠃ ᠠᠭᠤᠳᠠᠯᠵᠦ ᠬᠡᠯᠡᠮᠡᠷ ᠬᠦᠮᠦᠨ ᠪᠠᠰᠠ ᠤᠯᠳᠠᠬᠤ ᠦᠭᠡᠢ᠃ ᠦᠨᠤᠳᠤᠷ ᠬᠤᠶᠠᠭᠤᠯᠬᠠᠨ ᠢᠶᠠᠨ ᠭᠠᠶᠢᠭᠤᠢ ᠰᠠᠶᠢᠨ ᠵᠤᠭᠤᠭᠳᠠᠶ᠎ᠠ︾ ᠭᠡᠳ ᠦᠢᠯᠡᠴᠢᠯᠡᠭᠴᠢ ᠶᠢ ᠳᠤᠬᠢᠵᠦ ᠭᠠᠷᠭᠠᠭᠠᠳ ᠦᠪᠡᠷ  ᠢᠶᠠᠨ ᠬᠤᠨᠳᠠᠭᠠᠨ ᠳᠤ ᠠᠷᠢᠬᠢ ᠬᠡᠮᠨᠡᠯ᠎ᠡ᠃ ᠤᠷᠢᠳᠠᠪᠠᠷ ᠦᠨᠳᠦᠷ ᠨᠠᠰᠤᠳᠠᠳ ᠤᠨ ᠠᠮᠤᠷ ᠢ ᠨᠢᠭᠡ ᠨᠢᠭᠡ ᠪᠠᠷ ᠠᠰᠠᠭᠤᠵᠦ᠂ ᠪᠤᠷᠬᠠᠨ ᠪᠤᠯᠤᠭᠰᠠᠨ ᠤ ᠬᠢᠨᠢ ᠬᠤᠶᠢᠨ᠎ᠠ ᠠᠴᠠ᠄ ︽ᠶᠤᠰᠤᠳᠠᠢ ᠭᠤᠶᠤ ᠠᠬᠠᠮᠠᠳ ᠰᠢᠤ︾ ᠬᠡᠮᠡᠨ ᠲᠤᠯᠤᠭᠠᠢ ᠰᠡᠭᠰᠡᠷᠦᠨ᠎ᠡ᠃ ᠳᠠᠷᠠᠭ᠎ᠠ ᠨᠢ ᠦᠶ᠎ᠡ ᠶᠢᠨ ᠨᠠᠶᠢᠵᠢ ᠨᠠᠷ ᠲᠠᠭᠠᠨ ︽ᠪᠠᠶᠢᠴᠠᠭᠠᠯᠳᠠ︾ ᠬᠢᠵᠦ ︽ᠪᠢ ᠨᠤᠳᠤᠭ ᠲᠠᠭᠠᠨ ᠬᠠᠷᠢᠭᠠᠳ ᠲᠠ ᠨᠠᠷ ᠲᠠᠢ ᠪᠠᠨ ᠬᠠᠮᠳᠤ ᠪᠠᠶᠢᠭᠰᠠᠭᠠᠷ ᠪᠤᠴᠠᠵᠦ ᠢᠷᠡᠬᠦ ᠳᠤᠷ᠎ᠠ ᠦᠭᠡᠢ︾ ᠭᠡᠳ ᠬᠡᠮ  ᠲᠠᠢ ᠬᠢ ᠪᠠᠨ ᠭᠠᠭᠴᠠᠬᠠᠨ ᠬᠦᠨᠳᠡᠷᠦᠪᠡ᠃ ᠡᠵᠢ ᠠᠪᠤ ᠪᠠᠨ ᠵᠢᠷᠭᠠᠭᠤᠯᠤᠨ᠎ᠠ ᠭᠡᠵᠦ ᠢᠡᠭᠭᠢᠵᠦ ᠴᠢᠩᠭᠢᠵᠦ ᠤᠬᠠᠭᠠᠯᠠᠭᠰᠠᠭᠠᠷ ᠨᠤᠳᠤᠭ ᠤᠰᠤ ᠠᠶᠢᠯ ᠰᠠᠬᠠᠭᠠᠯᠳᠠ ᠮᠠᠯᠵᠢᠯ ᠠᠮᠢᠳᠤᠷᠠᠯ ᠠᠴᠠ ᠨᠢ ᠰᠠᠯᠭᠠᠵᠦ ᠬᠤᠳᠠ ᠳᠤ ᠠᠪᠴᠢᠷᠠᠨ ︽ᠲᠠᠩᠰᠤᠭᠯᠠᠭᠤᠯᠤᠭᠰᠠᠭᠠᠷ︾ ᠪᠠᠶᠢᠵᠦ ᠡᠷᠲᠡ ᠠᠴᠠ ᠡᠷᠲᠡ ᠬᠠᠳᠠᠨ ᠭᠡᠷ ᠲᠤ ᠨᠢ ᠶᠠᠪᠤᠭᠤᠯᠤᠭᠰᠠᠨ  ᠢᠶᠠᠨ ᠶᠠᠷᠢᠭᠠᠳ‌‍ᠲ᠋ᠠᠭᠤ ᠨᠢ ᠡᠷᠢᠶᠡᠨᠳᠤᠨ ᠬᠠᠮᠠᠷ ᠨᠢ ᠱᠤᠤᠬᠢᠳᠤᠨᠠᠵᠦ ᠨᠢᠯᠪᠤᠰᠤ ᠪᠠᠨ ᠴᠢᠳᠠᠨ ᠶᠠᠳᠠᠨ ᠬᠤᠷᠢᠵᠦ ᠪᠠᠶᠢᠭ᠎ᠠ  ᠨᠢ ᠢᠯᠡᠭᠡᠨ᠃ ᠶᠠᠭᠤ ᠬᠡᠯᠡᠬᠦ ᠪᠠᠨ ᠤᠯ ᠶᠠᠳᠠᠭᠰᠠᠨ ᠪᠢ ᠬᠡᠮ ᠡᠷᠭᠦᠭᠦ ᠳᠤ ᠲᠡᠷᠡ ᠮᠠᠨᠢ ᠪᠠᠰᠠ ᠯᠠ ᠬᠦᠨᠳᠡᠷᠦᠴᠢᠬᠡᠯ᠎ᠡ᠃      ︽ᠪᠢ ᠪᠠᠶᠠᠨ ᠬᠦᠮᠦᠨ᠂ ᠪᠢ ᠡᠨᠡ ᠬᠤᠳᠠ ᠳᠠᠭᠠᠨ ᠲᠤᠯᠤᠭᠠᠢ ᠪᠠᠶᠠᠨ ᠪᠢᠰᠢ ᠴᠦ ᠳᠤᠭᠠᠯᠠᠪᠠᠯ ᠳᠡᠰ ᠲᠤ ᠤᠷᠤᠳᠠᠭ ᠤᠨ ᠬᠢᠨᠢ ᠨᠢᠭᠡ ᠨᠢ᠃ ᠭᠡᠳᠡᠯ᠎ᠡ ᠠᠮᠢᠳᠤᠷᠠᠯ ᠶᠠᠮᠠᠷ ᠪᠠᠶᠢᠨ᠎ᠠ︖ ᠦᠳᠡᠰᠢ ᠤᠷᠤᠢ ᠠᠴᠠ ᠤᠷᠤᠢ ᠭᠡᠷ  ᠲᠡᠭᠡᠨ ᠬᠠᠷᠢᠵᠦ᠂ ᠦᠷᠯᠦᠭᠡ ᠡᠷᠲᠡ ᠠᠴᠠ ᠡᠷᠲᠡ ᠭᠠᠷᠴᠦ ᠶᠠᠪᠤᠨ᠎ᠠ᠃ ᠭᠡᠷ ᠠᠴᠠ ᠲᠡᠷᠭᠡ᠂ ᠲᠡᠷᠭᠡᠨ ᠠᠴᠠ ᠠᠯᠪᠠᠨ ᠭᠡᠷ᠂ ᠬᠤᠭᠤᠯᠠᠨ ᠭᠡᠷ᠂ ᠪᠢ ᠶᠠᠭ ᠠᠮᠢᠳᠤ ᠪᠠᠷ ᠢᠶᠠᠨ ᠠᠪᠰᠠᠨ ᠳᠤ ᠤᠷᠤᠭᠰᠠᠨ ᠰᠢᠭ᠋ ᠪᠠᠶᠢᠨ᠎ᠠ᠃ ᠪᠢ ᠡᠳᠦᠷᠵᠢᠨ ᠦᠪᠡᠷ  ᠤᠨ ᠢᠶᠠᠨ ᠳᠤᠳᠤᠨᠤ ᠬᠦᠮᠦᠨ ᠠᠴᠠ ᠪᠠᠨ ᠵᠠᠶᠢᠳᠠᠴᠢᠬᠠᠭᠠᠳ ᠬᠠᠭᠤᠷᠮᠠᠭ ᠢᠶᠠᠷ ᠵᠢᠷᠠᠭᠠᠵᠦ ᠶᠠᠪᠤᠨ᠎ᠠ︾᠃            ︽ᠡᠨᠡ ᠬᠤᠳᠠ ᠭᠡᠳᠡᠭ ᠴᠢᠨᠢ ᠶᠠᠭᠤ ᠶᠤᠮ᠂ ᠤᠳᠤᠭ᠎ᠠ ᠪᠠᠷ ᠠᠮᠢᠰᠬᠤᠯᠠᠯᠵᠦ ᠬᠤᠤᠷ ᠢᠶᠠᠷ ᠬᠤᠭᠤᠯᠯᠠᠵᠦ ᠤᠴᠠᠭᠠᠷ ᠢᠶᠠᠷ ᠴᠠᠳᠳᠠᠭ ᠭᠠᠵᠠᠷ᠃ ᠴᠡᠪᠳᠡᠭ ᠰᠡᠳᠬᠢᠯᠳᠡᠨ᠂ ᠬᠤᠪᠳᠤᠭ ᠰᠢᠨᠤᠯᠳᠠᠨ᠂ ᠦᠡᠭᠭᠡᠪᠴᠢ ᠵᠢᠰᠦᠷᠲᠡᠨ᠂ ᠳᠠᠩᠬᠠᠢ ᠠᠮᠢᠳᠠᠳ ᠤᠨ ᠳᠤᠭᠯᠠᠳᠠᠭ ᠭᠠᠵᠠᠷ᠃ ᠪᠢ ᠦᠪᠡᠷ ᠢ ᠪᠠᠨ ᠬᠡᠬᠡᠴᠢᠭᠡᠭᠡᠳ᠂ ᠠᠯᠳᠠᠵᠦ ᠶᠠᠪᠤᠭᠤᠯᠤᠴᠢᠬᠠᠭᠠᠳ ᠡᠷᠢᠵᠦ ᠤᠯᠬᠤ ᠦᠭᠡᠢ ᠭᠠᠰᠠᠯᠵᠦ ᠪᠠᠶᠢᠨ᠎ᠠ᠃ ᠪᠢ ᠬᠤᠳᠠ ᠶᠢᠨ ᠰᠢᠨ᠎ᠡ ᠢᠵᠠᠭᠤᠷᠲᠠᠨ ᠪᠤᠯᠵᠦ ᠤᠪᠠᠯᠠᠵᠦ ᠶᠠᠪᠤᠨ᠎ᠠ᠃ ᠨᠠᠮ ᠤᠨ ᠭᠡᠳᠡᠯ᠎ᠡ ᠠᠷᠠᠳ ᠤᠨ ᠲᠦᠯᠦᠭᠡᠯᠡᠭᠴᠢ᠂ ᠡᠨᠡ ᠲᠡᠷᠡ ᠨᠡᠶᠢᠭᠡᠮᠯᠢᠭ ᠤᠨ ᠨᠡᠷ᠎ᠡ ᠬᠦᠨᠳᠦᠳᠦ ᠬᠡᠮᠡᠭᠳᠡᠵᠦ ᠨᠡᠶᠢᠭᠡᠮ  ᠤᠨ ᠳᠡᠭᠡᠳᠦ ᠳᠠᠪᠬᠤᠷᠭᠠᠳᠠᠨ ᠤ ᠡᠩᠨᠡᠭᠡᠨ ᠳᠤ ᠳᠤᠩᠬᠠᠯᠵᠠᠵᠦ ᠶᠠᠪᠤᠨ᠎ᠠ᠃ ᠪᠢ ᠡᠷᠡᠭᠦᠯ ᠮᠡᠨᠳᠦ᠂ ᠡᠬᠡᠨᠡᠷ ᠬᠡᠤᠬᠡᠳ ᠲᠠᠢ  ᠪᠠᠨ ᠬᠠᠮᠳᠤ ᠡᠳ᠋ᠯᠡᠬᠦ ᠪᠠᠶᠠᠷ ᠵᠢᠷᠭᠠᠯ ᠢᠶᠠᠨ ᠵᠤᠯᠢᠶᠠᠰᠤᠯᠤᠭᠠᠳ ᠡᠳ᠋ ᠠᠰᠢᠭ᠂ ᠨᠡᠷ᠎ᠡ ᠲᠦᠷᠦ ᠶᠢᠨ ᠪᠤᠱᠤᠭᠠᠨ ᠪᠤᠭᠤᠯ ᠶᠠᠪᠤᠵᠦ ᠪᠠᠶᠢᠨ᠎ᠠ᠃ ᠪᠢ ᠠᠮᠢᠳᠤᠷᠠᠯ ᠠᠴᠠ ᠭᠠᠳᠠᠭᠤᠷ ᠲᠠᠩᠰᠤᠭᠯᠠᠵᠦ ᠴᠠᠭ ᠮᠦᠴᠡ ᠠᠴᠠ ᠭᠠᠳᠠᠭᠤᠷ ᠶᠠᠭᠠᠷᠠᠵᠦ ᠶᠠᠪᠤᠨ᠎ᠠ᠃ ᠪᠢ ᠬᠦᠮᠦᠨ ᠲᠦᠷᠦᠯᠬᠢᠲᠡᠨ ᠤ ᠠᠮᠢᠳᠤᠷᠠᠯ ᠤᠨ ᠵᠤᠯ ᠵᠢᠷᠭᠠᠯ ᠢ ᠤᠷᠬᠢᠯ ᠳᠤ ᠨᠢ ᠳᠤᠯᠳᠠᠯ᠎ᠠ ᠵᠤᠬᠢᠶᠠᠭᠰᠠᠨ ᠨᠡᠭᠦᠳᠡᠯᠴᠢᠨ ᠢᠵᠡᠭᠤᠷᠲᠠᠨ ᠠᠴᠠ ᠪᠠᠨ ᠠᠩᠭᠢ ᠵᠠᠶᠢᠳᠠᠭᠤ ᠵᠤᠯ ᠵᠢᠷᠭᠠᠯ ᠤᠨ ᠡᠷᠢᠯ ᠢᠶᠠᠷ ᠮᠠᠰᠢ ᠬᠤᠯᠠᠭᠤᠷ ᠲᠦᠭᠡᠷᠢᠵᠦ ᠶᠠᠪᠤᠨ᠎ᠠ︾᠃          ︽ᠠᠪᠤ ᠡᠵᠢ ᠮᠢᠨᠢ ᠬᠦᠳᠡᠭᠡ ᠳᠤ ᠪᠠᠨ ᠪᠠᠶᠢᠭᠰᠠᠨ ᠪᠤᠯ ᠮᠦᠨ ᠳᠡᠳᠡᠭᠡᠷ ︿ᠨᠤᠳᠤᠭ ᠢᠶᠠᠨ ᠰᠠᠬᠢᠵᠦ ᠨᠤᠭᠤᠯᠤᠭᠤᠷᠭ᠎ᠠ ᠪᠠᠨ ᠢᠳᠡᠭᠰᠡᠨ﹀ ᠪᠤᠭᠤᠷᠤᠯᠴᠤᠳ ᠲᠠᠢ ᠠᠳᠠᠯᠢ ᠠᠮᠢᠳᠤ ᠰᠡᠷᠡᠭᠦᠨ ᠵᠢᠷᠭᠠᠵᠦ ᠪᠠᠶᠢᠵᠦ ᠮᠡᠳᠡᠨ᠎ᠡ᠃ ᠠᠪᠤ ᠡᠵᠢ ᠪᠠᠨ ᠰᠠᠨᠠᠬᠤ ᠳᠤᠳᠤᠮ ᠢᠶᠠᠨ ᠪᠤᠰᠤᠭ᠎ᠠ ᠡᠷ᠎ᠠ ᠪᠢ ᠰᠡᠳᠬᠢᠯ ᠢᠶᠠᠷ ᠢᠶᠠᠨ ᠤᠨᠠᠭᠠᠳ ᠪᠠᠶᠢᠨ᠎ᠠ ᠡ᠂ ᠨᠠᠶᠢᠵᠢ ᠮᠢᠨᠢ︾ ᠭᠡᠳ ᠡᠬᠡᠷ ᠳᠠᠳᠠᠨ ᠤᠬᠢᠯᠠᠴᠢᠬᠠᠬᠤ ᠨᠢ ᠲᠡᠷᠡ᠃            ᠦᠷᠨᠢᠩᠭᠦᠢ ᠬᠦᠢᠲᠡᠨ ᠤᠮᠳᠠᠭᠠᠨ ᠠᠰᠬᠠᠨ ᠴᠢᠳᠬᠤᠨ ᠵᠠᠯᠬᠢᠯᠠᠵᠦ ᠠᠷᠢᠬᠢᠨ ᠤ ᠢᠳᠡ ᠨᠢ ᠪᠠᠭ᠋ᠠᠨ ᠳᠠᠷᠤᠭᠳᠠᠭᠰᠠᠨ ᠪᠤᠯᠤᠯᠳᠠᠢ ᠤᠷᠤᠭᠤᠯ ᠠᠮᠠ ᠪᠠᠨ ᠵᠦᠯᠭᠦᠨ ᠭᠦᠨ ᠠᠮᠢᠰᠬᠤᠭ᠎ᠠ ᠠᠪᠤᠭᠰᠠᠨ ᠢᠶᠠᠨ᠄ ︽ᠵᠠ᠂ ᠨᠠᠶᠢᠵᠢ ᠮᠢᠨᠢ᠂ ᠡᠪ ᠦᠭᠡᠢ ᠪᠤᠯᠤᠯ᠎ᠠ᠃ ᠠᠭᠤᠯᠵᠠᠭᠰᠠᠭᠠᠷ ᠯᠠ ᠭᠠᠰᠠᠯᠠᠩ ᠵᠤᠪᠠᠯᠠᠩ ᠢᠶᠠᠨ ᠳᠤᠭᠠᠴᠢᠭᠠᠳ ᠴᠢᠮᠠᠢᠢ ᠪᠠᠨ ᠰᠠᠶᠢᠬᠠᠨ ᠵᠤᠴᠢᠯᠠᠬᠤ ᠪᠠᠨ ᠮᠠᠷᠳᠠᠴᠢᠬᠠᠯ᠎ᠠ᠃ ᠤᠳᠤ ᠰᠠᠶᠢᠬᠠᠨ ᠶᠠᠭᠤᠮ᠎ᠠ ᠶᠠᠷᠢᠨ᠎ᠠ᠃ ᠨᠠᠶᠢᠵᠢ ᠨᠢ ᠤᠳᠤ ᠰᠠᠶᠢᠬᠠᠨ ᠶᠠᠷᠢᠨ᠎ᠠ ᠰᠢᠤ᠃ ᠮᠢᠨᠤ ᠨᠠᠶᠢᠵᠢ ᠪᠠᠰᠠ ᠰᠠᠶᠢᠬᠠᠨ ᠶᠠᠭᠤᠮ᠎ᠠ ᠶᠠᠷᠢᠭᠠᠴᠢ︕︾ ᠭᠡᠵᠦ ᠨᠠᠮᠠᠢᠢ ᠬᠦᠴᠦᠲᠡᠢ ᠨᠢᠳᠤᠷᠤᠯ᠎ᠠ᠃      ︽ᠵᠦᠯᠭᠡᠨ ᠤ ᠲᠠᠤᠯᠠᠢ ᠶᠢ ᠰᠠᠯᠬᠢ ᠦᠷᠭᠦᠭᠡᠵᠦ᠂ ᠵᠢᠷᠦᠬᠡᠨ ᠤ ᠦᠭᠡ ᠶᠢ ᠠᠷᠢᠬᠢ ᠭᠠᠷᠭᠠᠨ᠎ᠠ︾ ᠭᠡᠭᠴᠢ ᠦᠨᠡᠨ ᠳ᠋ᠠ᠃ ᠨᠠᠶᠢᠵᠢ ᠶᠢᠨ ᠮᠢᠨᠢ ᠶᠠᠷᠢᠭᠰᠠᠨ ᠦᠭᠡ ᠪᠤᠯᠭᠠᠨ ᠦᠨᠡᠨ ᠶᠤᠰᠤ ᠰᠢᠭ᠋ ᠰᠠᠨᠠᠭᠳᠠᠵᠦ ᠬᠤᠳᠠ ᠤᠷᠤᠬᠤ ᠭᠡᠰᠡᠨ ᠰᠠᠨᠠᠭ᠎ᠠ ᠮᠢᠨᠢ ᠤᠷᠤ ᠲᠠᠰᠤ ᠠᠷᠢᠯᠪᠠ᠃ ᠪᠢ ᠴᠢᠨᠢ ᠡᠰᠡᠯ᠎ᠡ ︽ᠵᠤᠪᠠᠯᠠᠩ ᠢᠶᠠᠨ ᠵᠤᠭᠤᠰ ᠢᠶᠠᠷ᠂ ᠵᠢᠷᠤᠭ᠎ᠠ ᠮᠤᠷᠢ ᠪᠠᠨ ᠡᠯᠵᠢᠭᠡ ᠪᠠᠷ︾ ᠤᠨ ᠦᠯᠢᠭᠡᠷ ᠭᠠᠷᠭᠠᠴᠢᠬᠠᠬᠤ ᠠᠯᠳᠠᠯ᠎ᠠ᠃ ᠵᠠᠯᠠᠭᠤ ᠠᠴᠠ ᠪᠠᠨ ᠬᠤᠳᠠ ᠳᠤ ᠢᠷᠡᠭᠡᠳ ᠠᠮᠵᠢᠯᠳᠠ ᠭᠠᠷᠭᠠᠭᠰᠠᠨ ᠡᠷᠳᠡᠮ ᠴᠢᠳᠠᠪᠤᠷᠢ ᠲᠠᠢ ᠬᠦᠮᠦᠨ ᠪᠠᠰᠠ ᠢᠡᠭᠭᠢᠵᠦ ᠪᠠᠶᠢᠬᠤ ᠶᠤᠮ ᠴᠢᠨᠢ ᠮᠢᠨᠤ ᠵᠡᠷᠭᠡ ᠶᠢᠨ ᠬᠦᠮᠦᠨ ᠴᠤᠬᠤᠮ ᠦᠷᠪᠤᠡᠭ ᠢᠶᠠᠷ ᠢᠶᠠᠨ ᠳᠤᠰᠠᠬᠤ ᠶᠤᠮ ᠪᠠᠶᠢᠨ᠎ᠠ᠃ ᠮᠠᠭᠤ ᠨᠠᠶᠢᠵᠢ ᠮᠢᠨᠢ ᠨᠠᠳᠠ ᠠᠴᠠ ᠬᠤᠯᠠ ᠢᠯᠡᠭᠦᠤ ᠵᠤᠪᠠᠭᠤᠷᠢ ᠲᠠᠢ ᠪᠠᠶᠢᠭ᠎ᠠ ᠶᠤᠮ ᠪᠠᠶᠢᠨ᠎ᠠ᠃ ᠪᠢ ᠨᠠᠶᠢᠵᠢ ᠶᠢᠨ ᠢᠶᠠᠨ ᠮᠢᠨᠤ ᠰᠠᠨᠠᠭ᠎ᠠ ᠶᠢ ᠮᠠᠳᠡᠴᠢᠬᠡᠬᠡᠳ ᠢᠳᠬᠠᠵᠦ ᠪᠠᠶᠢᠭ᠎ᠠ ᠰᠢᠭ᠋ ᠶᠠᠷᠢᠭᠰᠠᠨ ᠳᠤ ᠰᠡᠳᠬᠢᠯ ᠠᠴᠠ ᠪᠠᠨ ᠪᠠᠶᠠᠷᠯᠠᠵᠦ᠂ ᠶᠠᠭᠤᠨ ᠰᠠᠶᠢᠨ ᠡᠭᠦᠨ ᠢ ᠪᠠᠨ ᠡᠷᠢᠭᠡᠳ ᠢᠷᠡᠭᠰᠡᠨ ᠪᠤᠢ ᠭᠡᠵᠦ ᠳᠤᠳᠤᠷ᠎ᠠ ᠪᠠᠨ ᠵᠠᠯᠪᠢᠷᠠᠯ᠎ᠠ᠃            ︽ᠵᠠ᠂ ᠤᠳᠤ ᠨᠠᠶᠢᠵᠢ ᠨᠢ ᠴᠢᠮ᠎ᠠ ᠳᠠᠭᠠᠨ ᠭᠡᠷᠭᠡᠢ ᠪᠢᠳᠡ ᠬᠤᠶᠠᠷ ᠤᠨ ᠰᠢᠨᠡᠬᠡᠨ ᠲᠦᠯᠦᠪᠯᠡᠭᠡ ᠪᠠᠨ ᠬᠡᠯᠡᠵᠦ ᠦᠭᠭᠦᠶ᠎ᠡ︾ ᠭᠡᠰᠡᠨ ᠪᠠᠶᠠᠷᠯᠠᠩᠭᠤᠢ ᠳᠠᠭᠤᠨ ᠳᠤ ᠪᠤᠳᠤᠯ ᠳᠠᠰᠤᠯᠤᠭᠳᠠᠨ ᠦᠷᠨᠢᠩᠭᠦᠢ ᠶᠢ ᠬᠠᠷᠠᠪᠠᠯ ᠨᠢᠭᠤᠷ ᠢᠶᠠᠨ ᠨᠤᠷᠭᠠᠵᠦ ᠦᠰᠦ ᠭᠡᠵᠢᠭᠡ ᠶᠠᠩᠵᠤᠯᠠᠴᠢᠬᠠᠭᠰᠠᠨ ᠨᠠᠮᠠᠢᠢ ᠬᠠᠷᠠᠨ ᠢᠨᠢᠶᠡᠨ ᠵᠤᠭᠰᠤᠵᠦ ᠪᠠᠶᠢᠪᠠ᠃            ︽ᠨᠠᠮᠠᠢᠢ ᠵᠤᠭᠤᠰ ᠵᠤᠭᠤᠰ ᠭᠡᠳ ᠦᠭᠦᠯ ᠠᠯᠳᠠᠨ ᠶᠠᠭᠠᠷᠠᠵᠦ ᠪᠠᠶᠢᠬᠤ ᠵᠢᠯ ᠤᠳ ᠲᠤ ᠮᠢᠨᠤ ᠭᠡᠷᠭᠡᠢ ᠬᠤᠳᠠ ᠬᠦᠳᠡᠭᠡ ᠬᠤᠶᠠᠷ ᠤᠨ ᠬᠤᠭᠤᠷᠤᠨᠳᠤ ᠬᠤᠯᠬᠢᠭᠠᠳ ᠪᠠᠶᠢᠳᠠᠭ ᠢ ᠨᠢ ᠪᠢ ᠤᠶᠢᠰᠢᠶᠠᠳᠠᠭ ᠴᠦ ᠦᠭᠡᠢ᠃ ᠮᠠᠯᠴᠢᠨ ᠤ ᠦᠷᠡᠰ ᠤᠨ ᠵᠤᠯ ᠵᠢᠷᠭᠠᠯ ᠬᠤᠳᠠ ᠳᠤ ᠦᠭᠡᠢ ᠬᠦᠳᠡᠭᠡ ᠳᠤ ᠪᠠᠶᠢᠳᠠᠭ ᠢ ᠤᠬᠠᠭᠠᠷᠠᠭᠠᠳ ᠬᠦᠳᠡᠭᠡ ᠳᠡᠭᠡᠨ ᠬᠠᠷᠢᠮᠠᠷ ᠪᠠᠶᠢᠨ᠎ᠠ ᠭᠡᠬᠦ ᠶᠢᠨ ᠦᠶ᠎ᠡ ᠳᠤ ᠨᠢᠭᠤᠵᠦ ᠪᠠᠶᠢᠭᠰᠠᠨ ᠶᠤᠮ ᠤᠤ ᠡᠰᠡᠭᠦᠯ᠎ᠡ ᠪᠢ ᠤᠶᠢᠰᠢᠶᠠᠬᠤ ᠦᠭᠡᠢ ᠪᠤᠯᠬᠤᠷ ᠳᠤᠤᠭᠠᠷᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠤ ᠠᠯᠢ ᠨᠢ ᠪᠤᠯᠤᠭ ᠶᠠᠭᠤ ᠭᠡᠰᠡᠨ ᠰᠡᠳᠬᠢᠯ ᠬᠦᠳᠡᠯᠭᠡᠬᠦ ᠰᠠᠶᠢᠬᠠᠨ ᠤᠴᠢᠷ ᠢ ᠳᠡᠯᠭᠡᠭᠡᠳ ᠦᠭᠭᠦᠭᠰᠡᠨ ᠢ ᠶᠠᠭᠠᠬᠢᠨ᠎ᠡ︖︾᠂ ︽ᠴᠢ ᠮᠡᠳᠡᠨ᠎ᠡ ᠰᠢᠳᠠ᠂ ᠮᠢᠨᠤ ᠬᠡᠷᠭᠡᠢ ᠬᠦᠳᠡᠭᠡ ᠳᠡᠭᠡᠨ ᠪᠠᠶᠢᠭᠰᠠᠨ᠃ ᠨᠠᠳᠠ ᠲᠠᠢ ᠬᠤᠷᠢᠮᠯᠠᠭᠠᠳ ᠰᠠᠢᠢ ᠬᠤᠳᠠ ᠳᠤ ᠢᠷᠡᠭᠰᠡᠨ ᠪᠤᠯᠬᠤᠷ ᠦᠨᠤ ᠡᠷᠦᠬᠡ ᠠᠮᠠ ᠶᠢᠨ ᠳᠠᠩᠰᠠ ᠭᠡᠳᠡᠭ ᠶᠠᠭᠤᠮ᠎ᠠ ᠶᠢ ᠨᠠᠰᠢ ᠪᠠᠨ ᠰᠢᠯᠵᠢᠭᠦᠯᠦᠭᠰᠡᠨ ᠦᠭᠡᠢ ᠶᠤᠮ᠃ ᠭᠡᠷ ᠤᠨ ᠤᠴᠢᠷ ᠢ ᠮᠠᠨ ᠤ ᠬᠦᠮᠦᠨ ᠨᠠᠳᠠ ᠲᠠᠢ ᠵᠦᠪᠳᠡᠨ᠎ᠡ ᠭᠡᠪᠡᠯ ᠪᠢ ᠶᠠᠭᠠᠷᠠᠤ ᠳᠠᠭᠠᠨ ᠰᠢᠯᠳᠠᠵᠦ ︿ᠴᠢ ᠦᠵᠡᠵᠦ ᠪᠠᠶᠢᠭᠠᠳ ᠪᠤᠯᠭᠠᠴᠢᠬ᠎ᠠ﹀ ᠭᠡᠳ ᠳᠦᠯᠬᠢᠴᠡᠳᠡᠭ ᠶᠤᠮ᠃ ᠲᠡᠭᠡᠭᠰᠡᠨ ᠴᠢᠨᠢ ᠶᠠᠭᠤ ᠪᠤᠯᠵᠦ ᠤᠤ︖ ᠮᠠᠨ ᠤ ᠬᠦᠮᠦᠨ ᠭᠤᠷᠪᠠᠨ ᠬᠡᠤᠬᠡᠳ ᠤᠨ ᠢᠶᠠᠨ ᠨᠢᠬᠡ ᠶᠢ ᠨᠢ ᠦᠪᠡᠷ ᠤᠨ ᠨᠡᠷ᠎ᠡ ᠳᠡᠭᠡᠷ᠎ᠡ᠂ ᠬᠤᠶᠠᠷ ᠢ ᠨᠢ ᠡᠪᠦᠭᠡ ᠡᠮᠡᠭᠡ ᠶᠢᠨ ᠬᠢᠨᠢ ᠨᠡᠷ᠎ᠡ ᠳᠡᠭᠡᠷ᠎ᠡ ᠳᠡᠮᠳᠡᠭᠯᠡᠭᠦᠯᠴᠢᠬᠡᠭᠰᠡᠨ ᠪᠠᠶᠢᠵᠠᠢ᠃ ᠤᠳᠤ ᠪᠤᠯᠬᠤ ᠳᠤ ᠦᠪᠡᠷ ᠤᠨ ᠬᠢᠨᠢ ᠭᠠᠵᠠᠷ ᠨᠤᠳᠤᠭ᠂ ᠡᠪᠦᠭᠡ ᠡᠮᠡᠭᠡ ᠶᠢᠨ ᠬᠢᠨᠢ ᠭᠠᠵᠠᠷ ᠨᠤᠳᠤᠭ ᠢ ᠦᠮᠴᠢᠯᠡᠨ ᠠᠪᠤᠭᠰᠠᠨ ᠢ ᠨᠡᠶᠢᠯᠡᠭᠦᠯᠵᠦ ᠪᠤᠳᠤᠪᠠᠯ ᠬᠢᠷᠢ ᠪᠠᠷᠤᠭ ᠤᠨ ᠠᠶᠢᠯ ᠠᠴᠠ ᠬᠤᠯᠠ ᠢᠯᠡᠭᠦᠤ ᠨᠤᠳᠤᠭ ᠲᠠᠢ ᠠᠶᠢᠯ ᠪᠤᠯᠴᠢᠬᠠᠵᠠᠢ᠃ ᠤᠳᠤ ᠪᠢ ᠴᠢᠨᠢ ᠭᠡᠷᠭᠡᠢ ᠶᠢᠨ ᠢᠶᠠᠨ ᠰᠠᠶᠢᠨ ᠢᠶᠠᠷ ︿ᠲᠦᠭᠡᠷᠢᠭᠰᠡᠭᠡᠷ ᠲᠦᠭᠡᠷᠢᠭᠰᠡᠭᠡᠷ ᠲᠦᠷᠦᠯ ᠳᠡᠭᠡᠨ ﹀ ᠬᠠᠷᠢᠬᠤ ᠪᠤᠯᠵᠦ ᠪᠠᠶᠢᠨ᠎ᠠ᠃ ᠮᠠᠨ ᠤ ᠮᠠᠯᠴᠢᠨ ᠬᠦᠮᠦᠨ ᠡᠨᠡ ᠬᠤᠳᠠ ᠳᠤ ᠴᠠᠭᠠᠭᠴᠢᠯᠠᠬᠤ ᠪᠠᠷ ᠬᠠᠰᠢ ᠯᠠ ᠬᠦᠷᠦᠰᠦ ᠲᠠᠢ ᠬᠦᠷᠦᠩᠭᠡ ᠲᠠᠢ ᠪᠠᠨ ᠵᠢᠭᠤᠷᠠᠵᠦ᠂ ᠦᠰᠦ ᠲᠠᠢ ᠪᠤᠶᠠᠨ ᠢᠶᠠᠨ ᠦᠰᠭᠡᠪᠡᠯ ᠰᠠᠢᠢ ᠡᠷᠭᠡ ᠵᠢᠷᠭᠠᠯ ᠲᠠᠢ ᠠᠮᠢᠳᠤᠷᠠᠵᠦ ᠳᠡᠶᠢᠯᠦᠨ᠎ᠡ᠃ ︿ᠨᠤᠳᠤᠭ ᠠᠯᠳᠠᠪᠠᠯ ᠭᠤᠳᠤᠭ ᠠᠯᠳᠠᠨ᠎ᠠ﹀᠂ ᠡᠳ᠋ ᠮᠦᠡᠭᠭᠦ ᠭᠠᠭᠴᠠ ᠦᠶ᠎ᠡ ᠶᠢᠨ ᠪᠤᠶᠠᠨ᠂ ᠭᠠᠵᠠᠷ ᠨᠤᠳᠤᠭ ᠦᠶ᠎ᠡ ᠶᠢᠨ ᠦᠶ᠎ᠡ ᠶᠢᠨ ᠪᠤᠶᠠᠨ᠃ ᠮᠢᠨᠤ ᠬᠦᠳᠡᠭᠡ ᠳᠡᠭᠡᠨ ᠬᠠᠷᠢᠬᠤ ᠶᠢᠨ ᠭᠤᠤᠯ ᠵᠤᠷᠢᠯᠭ᠎ᠠ ᠨᠢ ᠦᠪᠡᠷ ᠢᠶᠠᠨ ᠵᠢᠷᠭᠠᠯ ᠡᠳ᠋ᠯᠡᠬᠦ ᠪᠠᠷ ᠪᠠᠷᠠᠬᠤ ᠦᠭᠡᠢ ᠦᠷ᠎ᠡ ᠬᠡᠤᠬᠡᠳ ᠢ ᠪᠠᠨ ᠦᠮᠴᠢᠯᠡᠵᠦ ᠤᠯᠬᠤ ᠭᠠᠵᠠᠷ ᠨᠤᠳᠤᠭ  ᠲᠠᠢ ᠨᠢ ᠬᠠᠶᠢᠷ᠎ᠠ ᠰᠡᠳᠬᠢᠯ ᠢᠶᠠᠷ ᠨᠢ ᠠᠷᠭᠠᠮᠵᠢᠵᠦ ᠲᠠᠯᠪᠢᠶ᠎ᠠ ᠭᠡᠰᠡᠨ ᠤᠬᠠᠭᠠᠨ︾᠃            ᠬᠤᠳᠠ ᠳᠤ ᠨᠡᠭᠦᠭᠰᠡᠨ ᠬᠦᠮᠦᠰ ᠤᠨ ᠠᠯᠢ ᠰᠠᠶᠢᠬᠠᠨ ᠲᠠᠯ᠎ᠠ ᠶᠢ ᠨᠢ ᠳᠤᠭᠠᠴᠢᠵᠦ ᠪᠢᠳᠡ ᠪᠠᠰᠠ ᠬᠤᠳᠠ ᠤᠷᠤᠬᠤ ᠴᠦ ᠶᠤᠮ ᠤᠤ ᠭᠡᠵᠦ ᠦᠭᠡᠨ ᠰᠡᠵᠢᠭᠦᠷ ᠴᠤᠬᠤᠶᠢᠯᠭᠠᠪᠠᠯ ᠭᠡᠷᠭᠡᠢ ᠮᠢᠨᠢ᠄ ︽ᠪᠢ ᠬᠠᠶᠢᠷ᠎ᠠ ᠲᠠᠢ ᠮᠠᠯ ᠠᠴᠠ  ᠪᠠᠨ ᠰᠠᠯᠪᠠᠯ ᠰᠦᠨᠡᠰᠦ ᠪᠠᠨ ᠭᠡᠭᠡᠴᠢᠭᠡᠬᠦ ᠪᠠᠶᠢᠬ᠎ᠠ︖ ᠳᠡᠭᠡᠭᠡᠳ ᠴᠢ ᠰᠦᠨᠡᠰᠦ ᠦᠭᠡᠢ ᠡᠭᠡᠨᠡᠷ ᠳᠠᠭᠠᠭᠤᠯᠤᠭᠠᠳ ᠬᠤᠳᠠ ᠤᠷᠤᠪᠠᠯ ᠤᠯᠠᠨ ᠤ ᠡᠯᠡᠭ ᠪᠤᠯᠤᠨ᠎ᠠ ᠳ᠋ᠠ︾ ᠬᠡᠵᠦ ᠨᠠᠭᠠᠳᠤᠮ ᠬᠢᠭᠡᠳ ᠦᠡᠭᠭᠡᠷᠡᠭᠡᠳᠡᠭ ᠶᠤᠮ᠃ ᠮᠠᠨ ᠤ ᠬᠦᠮᠦᠨ ᠦᠨᠡᠷᠡᠨ ᠴᠦ ᠮᠠᠯ ᠳᠠᠭᠠᠨ ᠬᠠᠶᠢᠷ᠎ᠠ ᠲᠠᠢ ᠭᠡᠳᠡᠭ ᠨᠢ ᠵᠢᠭᠲᠡᠶᠢᠬᠡᠨ᠃ ᠦᠨᠢᠶ᠎ᠡ ᠳᠤᠭᠤᠯ ᠲᠠᠢ ᠪᠠᠨ ᠲᠦᠡᠭᠭᠢᠨᠡᠲᠡᠯ᠎ᠡ ᠶᠠᠷᠢᠭᠠᠳ ᠯᠠ᠂ ᠵᠠᠷᠢᠮ ᠳᠠᠭᠠᠨ ᠪᠦᠷ ᠬᠠᠳᠠᠭᠠᠨᠠᠲᠠᠯ᠎ᠠ ᠢᠨᠢᠶᠡᠭᠡᠳ ᠯᠠ ᠨᠠᠶᠢᠵᠢᠷᠬᠠᠴᠢᠬᠠᠬᠤ ᠶᠤᠮ᠃ ᠪᠠᠷᠤᠭ ᠤᠨ ᠳᠤᠭᠰᠢᠨ ᠭᠤᠨᠵᠢ ᠤᠳ ᠢ ᠤᠬᠠᠭᠠᠯᠵᠦ ᠠᠷᠭᠠᠳᠠᠵᠦ ᠪᠠᠶᠢᠭᠠᠳ ᠰᠠᠭᠠᠭᠠᠳ ᠰᠤᠷᠭᠠᠴᠢᠬᠠᠨ᠎ᠠ᠃ ᠦᠭᠡᠢ᠂ ᠶᠡᠷᠤᠨᠢ ᠮᠠᠨ ᠤ ᠬᠦᠮᠦᠨ ᠮᠠᠯ ᠳᠤ ᠰᠠᠶᠢᠨ ᠪᠠᠶᠢᠳᠠᠭ ᠤᠨ ᠬᠢ ᠴᠤ ᠶᠤᠮ ᠤᠤ︖ ᠮᠠᠨ ᠤ ᠮᠠᠯ ᠦᠰᠦᠨ᠎ᠡ ᠭᠡᠵᠦ ᠦᠰᠦᠨ᠎ᠡ ᠤᠤ︖ ᠦᠪᠡᠷ ᠤᠨ ᠰᠦᠷᠦᠭ ᠠᠴᠠ ᠪᠠᠨ ᠢᠳᠡᠰᠢᠨ ᠤ ᠰᠤᠪᠠᠢ ᠦᠨᠢᠶ᠎ᠡ ᠤᠯᠤᠶ᠎ᠠ ᠭᠡᠳ ᠭᠠᠷᠳᠠᠭ ᠦᠭᠡᠢ᠃ ᠬᠦᠷᠡᠩ ᠪᠤᠷᠤ ᠴᠢᠷᠠᠢ ᠳᠠᠭᠠᠨ ᠬᠡᠵᠢᠶᠡᠳᠡ ᠪᠠᠨ ᠢᠨᠢᠶᠡᠳᠦ ᠳᠤᠳᠤᠷᠠᠭᠤᠯᠵᠦ ᠳᠠᠭᠤᠤ ᠠᠶᠠᠯᠠᠭᠤᠯᠤᠨ ᠭᠡᠷ ᠭᠠᠳᠠᠨ᠎ᠠ ᠶᠢᠨ ᠠᠵᠢᠯ ᠢ ᠰᠦᠢᠯᠵᠡᠭᠦᠯᠳᠡᠭ ᠨᠢ ᠤᠯᠠᠮ ᠴᠦ ᠬᠠᠶᠢᠷᠠᠯᠠᠯᠳᠠᠢ ᠰᠠᠨᠠᠭᠳᠠᠵᠦ᠂ ᠪᠤᠯᠳᠠᠭ ᠪᠤᠯ ᠦᠨᠤ ᠤᠷᠤᠢ  ᠳᠠᠭᠠᠨ ᠬᠠᠷᠢᠭᠠᠳ ᠠᠯᠢ ᠰᠠᠶᠢᠬᠠᠨ ᠦᠭᠡ ᠪᠠᠨ ᠰᠤᠨᠤᠰᠬᠠᠵᠦ ᠬᠠᠯᠠᠭᠤᠨ ᠳᠤᠳᠤᠨᠤ ᠪᠠᠷ ᠡᠩᠭᠦᠷᠡᠶᠢᠯᠡᠮᠡᠷ          ᠰᠠᠨᠠᠭᠳᠠᠪᠠ᠃          ᠤᠳᠠᠰᠤ ᠳᠤᠰᠬᠤ ᠪᠠᠷ ᠭᠠᠷᠤᠭᠰᠠᠨ ᠬᠤᠭᠤᠷᠤᠨᠳᠤ ᠡᠶᠢᠨᠬᠦ ᠪᠤᠳᠤᠯ ᠤᠷᠭᠤᠭᠤᠯᠵᠦ ᠪᠠᠶᠢᠭᠰᠠᠨ ᠢ ᠦᠷᠨᠢᠩᠭᠦᠢ ᠮᠡᠳᠡᠴᠢᠬᠡᠬᠡᠳ ᠦᠭᠡ ᠶᠢᠨ ᠤᠳᠬ᠎ᠠ ᠨᠡᠶᠢᠯᠡᠭᠦᠯᠭᠦ ᠭᠡᠰᠡᠨ ᠶᠤᠮ ᠰᠢᠭ᠄ ︽ᠦᠭᠡᠢ᠂ ᠶᠡᠷᠦᠨᠢ ᠱᠤᠭ ᠲᠠᠢ ᠰᠢᠤ᠃ ᠮᠠᠨ ᠤ ᠬᠦᠮᠦᠨ ᠬᠦᠳᠡᠭᠡ ᠳᠡᠭᠡᠨ ᠬᠠᠷᠢᠭᠠᠳ ᠢᠷᠡᠬᠦ ᠳᠤ ᠨᠠᠷᠠ ᠰᠠᠯᠬᠢᠨ ᠳᠤ ᠪᠤᠷᠤᠯᠠᠭᠰᠠᠨ ᠴᠢᠷᠠᠢ ᠠᠴᠠ ᠨᠢ ᠵᠢᠩᠬᠢᠨᠢ ᠠᠮᠢᠳᠤ ᠶᠢᠨ ᠭᠡᠷᠡᠯ ᠰᠠᠴᠤᠷᠠᠵᠦ᠂ ᠪᠡᠶᠡᠨ ᠠᠴᠠ ᠨᠢ ᠨᠢᠯᠬ᠎ᠠ ᠪᠠᠭ᠎ᠠ ᠪᠠᠶᠢᠬᠤ ᠳᠠᠭᠠᠨ ᠡᠵᠢ ᠠᠴᠠ ᠪᠠᠨ ᠯᠠ ᠤᠯᠵᠦ ᠦᠨᠦᠷᠳᠦᠳᠡᠭ ᠰᠤᠳᠤᠨ ᠰᠠᠶᠢᠬᠠᠨ ᠦᠨᠦᠷ ᠤᠨ ᠳᠡᠭᠡᠷ᠎ᠡ ᠰᠠᠭᠠᠯᠢ ᠶᠢᠨ ᠦᠨᠦᠷ᠂ ᠠᠷᠭᠠᠯ ᠤᠨ ᠤᠳᠤᠭᠠᠨ ᠤ ᠦᠨᠦᠷ᠂ ᠢᠰᠡᠭᠡᠢ ᠭᠡᠷ ᠤᠨ ᠦᠨᠦᠷ ᠠᠯᠢ ᠠᠯᠢ ᠨᠢ ᠨᠡᠶᠢᠯᠡᠭᠰᠡᠨ ᠬᠠᠴᠢᠨ ᠰᠠᠶᠢᠬᠠᠨ ᠦᠨᠦᠷ ᠬᠠᠨᠭ᠍ᠬᠤᠯᠠᠵᠦ᠂ ᠬᠤᠳᠠ ᠳᠠᠭᠠᠨ ᠪᠠᠶᠢᠬᠤ ᠦᠶ᠎ᠡ ᠶᠢᠨ ᠬᠢᠮᠢ ᠶᠢᠨ ᠪᠤᠳᠠᠰ ᠤᠨ ᠦᠨᠦᠷ ᠨᠢ ᠪᠦᠷ ᠳᠠᠷᠤᠭᠳᠠᠴᠢᠬᠠᠭᠠᠳ ᠳᠤᠷ᠎ᠠ ᠬᠠᠶᠢᠷ᠎ᠠ ᠶᠢ ᠳᠠᠳᠠᠳᠠᠭ ᠶᠤᠮ᠃ ᠳᠡᠭᠡᠭᠡᠳ ᠪᠢ ᠬᠡᠵᠢᠶᠡᠳᠡ ︿ᠴᠢ ᠬᠦᠳᠡᠭᠡ ᠳᠡᠭᠡᠨ ᠶᠠᠪᠤᠭᠠᠳ ᠢᠷᠡᠭᠰᠡᠭᠡᠷ ᠬᠦᠮᠦᠨ ᠤ ᠦᠨᠦᠷ ᠲᠠᠢ ᠪᠤᠯᠴᠢᠬᠠᠬᠤ ᠶᠤᠮ﹀ ᠭᠡᠵᠦ ᠳᠤᠮᠤᠭᠯᠠᠬᠤ ᠳᠤ ᠮᠠᠨ ᠤ ᠬᠦᠮᠦᠨ ︿ᠦᠨᠡᠷᠡᠨ ᠲᠡᠶᠢᠮᠤ ᠶᠤᠮ ᠪᠤᠯ ᠡᠷᠲᠡᠭᠡᠨ ᠬᠦᠳᠡᠭᠡ  ᠳᠡᠭᠡᠨ ᠬᠠᠷᠢᠵᠦ ᠬᠦᠮᠦᠨ ᠤ ᠪᠠᠨ ᠦᠨᠦᠷ ᠲᠠᠢ ᠪᠠᠶᠢᠶ᠎ᠠ﹀ ᠭᠡᠵᠦ ᠱᠠᠭᠠᠷᠳᠠᠭᠠᠳ ᠪᠠᠶᠢᠳᠠᠭ ᠶᠤᠮ᠃︾ ᠭᠡᠵᠦ ᠪᠠᠭ᠋ᠠᠰᠢᠶᠠᠨ ᠶᠠᠷᠢᠨ᠎ᠠ᠃              ︽ᠨᠠᠶᠢᠵᠠ ᠨᠢ ᠭᠡᠷ ᠢᠶᠠᠷ ᠢᠶᠠᠨ ᠬᠦᠳᠡᠭᠡ ᠳᠡᠭᠡᠨ ᠨᠡᠭᠦᠵᠦ ᠬᠠᠷᠢᠬᠤ ᠪᠠᠷ ᠰᠢᠭᠤᠳᠤᠭᠰᠠᠨ᠃ ᠤᠳᠤ ᠶᠠᠭ ᠠᠪᠴᠠᠭ᠎ᠠ ᠦᠭᠴᠡᠭᠡ ᠪᠠᠨ ᠲᠢᠭᠯᠡᠵᠦ᠂ ᠮᠢᠨᠤ ᠲᠤᠮᠤᠵᠢᠬᠤ ᠳᠤ ᠬᠦᠴᠦ ᠡᠷᠭᠦᠭᠰᠡᠨ ᠬᠦᠮᠦᠰ ᠤᠨ ᠢᠶᠠᠨ ᠠᠴᠢ ᠳᠤᠰᠠ  ᠶᠢ ᠬᠠᠷᠢᠭᠤᠯᠬᠤ ᠠᠵᠢᠯ ᠤᠳ ᠢ ᠵᠤᠬᠢᠴᠠᠭᠤᠯᠵᠦ ᠪᠠᠶᠢᠨ᠎ᠠ᠃ ᠳᠠᠷᠠᠭ᠎ᠠ ᠨᠢ ᠺᠤᠮᠫᠠᠨᠢ ᠪᠤᠯᠤᠨ ᠬᠦᠷᠦᠩᠭᠡ ᠪᠠᠨ ᠦᠨ᠎ᠡ ᠬᠠᠶᠠᠨ ᠬᠤᠳᠠᠯᠳᠤᠵᠦ᠂ ᠤᠯᠠᠩᠭᠢ ᠶᠢ ᠨᠢ ︿ᠨᠤᠶᠠᠨ ᠮᠤᠩᠭᠤᠯ ᠰᠠᠭᠤᠷᠢ ᠮᠦᠡᠭᠭᠦᠨ ᠤ ᠰᠠᠩ﹀ ᠳᠤ ᠬᠠᠨᠳᠢᠪᠯᠠᠨ᠎ᠠ᠃ ᠵᠠ᠂ ᠳᠡᠭᠡᠭᠡᠳ ᠦᠯᠡᠳᠡᠭᠰᠡᠨ ᠢᠶᠠᠷ ᠨᠢ ᠬᠦᠳᠡᠭᠡ ᠳᠡᠭᠡᠨ ᠭᠡᠷ ᠲᠡᠷᠭᠡ ᠪᠠᠨ ᠳᠦᠪᠬᠢᠨᠡᠭᠦᠯᠦᠨ᠎ᠡ ᠳ᠋ᠠ︾ ᠭᠡᠳ ᠪᠠᠭ᠎ᠠ  ᠶᠢᠨ ᠦᠶ᠎ᠡ ᠶᠢᠨ ᠢᠶᠠᠨ ᠢᠨᠢᠶᠡᠳᠡᠭ ᠮᠠᠶ᠋ᠢᠭ ᠢᠶᠠᠷ ᠬᠠᠭ᠋ᠠᠯᠠᠵᠦ ᠭᠠᠷᠪᠠ᠃              ︽ᠳᠤᠮᠤ ᠪᠠᠶᠠᠨ ᠬᠦᠮᠦᠨ ᠬᠦᠳᠡᠭᠡ ᠳᠡᠭᠡᠨ ᠨᠤᠳᠤᠭᠯᠠᠪᠠᠯ ᠯᠠᠪᠳᠠᠢ ᠯᠤᠳᠤ ᠲᠠᠩᠰᠤᠭ ᠤᠷᠳᠤᠨ ᠴᠤᠭᠴᠠᠯᠠᠨ᠎ᠠ ᠪᠢᠵᠠ ᠳ᠋ᠠ︖︾ ᠭᠡᠪᠡᠯ ᠦᠷᠨᠢᠩᠭᠦᠢ ᠭᠠᠷ ᠰᠠᠵᠢᠬᠤ ᠳᠤᠯᠤᠭᠠᠢ ᠰᠡᠭᠰᠡᠷᠡᠬᠦ ᠶᠢ ᠵᠡᠷᠭᠡ ᠦᠵᠡᠭᠦᠯᠵᠦ᠄ ︽ᠦᠭᠡᠢ᠂ ᠦᠭᠡᠢ᠃ ᠪᠢ ᠬᠡᠳᠦᠷᠬᠡᠢ ᠲᠠᠩᠰᠤᠭᠯᠠᠪᠠᠯ ᠲᠠ ᠨᠠᠷ ᠠᠴᠠ ᠮᠦᠨ ᠯᠠ ᠬᠤᠯᠠᠳᠠᠴᠢᠬᠠᠨ᠎ᠠ᠃ ᠪᠢᠳᠡ ᠬᠤᠶᠠᠷ ᠳᠦᠰᠦᠪ  ᠢᠶᠠᠨ ᠪᠦᠷ ᠳᠤᠭᠳᠠᠭᠠᠴᠢᠬᠠᠭᠰᠠᠨ᠃ ᠰᠠᠭᠤᠷᠢᠨ ᠳᠠᠭᠠᠨ ᠬᠡᠳᠦᠨ ᠳᠠᠰᠤᠯᠭ᠎ᠠ ᠭᠡᠷ ᠪᠠᠷᠢᠨ᠎ᠠ᠂ ᠵᠤᠰᠠᠯᠠᠩ ᠤᠳᠤᠷ ᠭᠠᠷᠬᠤ  ᠳᠤ ᠬᠡᠷᠡᠭᠯᠡᠬᠦ ᠬᠤᠶᠠᠷ ᠮᠤᠩᠭᠤᠯ ᠭᠡᠷ ᠪᠡᠯᠡᠳᠭᠡᠨ᠎ᠡ᠃ ᠬᠡᠳᠦᠨ ᠵᠠᠭᠤᠨ ᠬᠤᠨᠢ ᠢᠮᠠᠭ᠎ᠠ᠂ ᠬᠤᠶᠠᠷ ᠠᠵᠢᠷᠭ᠎ᠠ ᠠᠳᠤᠭᠤ᠂ ᠬᠤᠷᠢᠭᠠᠳ ᠦᠨᠢᠶ᠎ᠡ ᠳᠤᠭᠤᠯᠯᠠᠬᠤ ᠪᠠᠷ ᠦᠬᠡᠷ ᠤᠨ ᠰᠦᠷᠦᠭ ᠲᠠᠢ ᠪᠤᠯ ᠪᠤᠯᠴᠢᠬᠠᠬᠤ ᠨᠢ ᠲᠡᠷᠡ᠃ ᠤ᠂ ᠪᠠᠰᠠ ᠬᠡᠳᠦᠨ ᠲᠡᠮᠡᠭᠡ ᠠᠪᠤᠨ᠎ᠠ᠃ ᠳᠡᠭᠡᠭᠡᠳ ᠯᠠ ᠲᠠ ᠨᠠᠷ ᠲᠠᠢ ᠪᠠᠨ ᠠᠶᠢᠯ ᠰᠠᠬᠠᠭᠠᠯᠳᠠ᠂ ᠠᠮᠠᠷᠬᠠᠨ ᠪᠠᠶᠠᠷᠯᠠᠵᠦ ᠳᠦᠭᠦᠮᠬᠡᠨ ᠵᠢᠷᠭᠠᠨ᠎ᠠ ᠳ᠋ᠠ᠃︾              ︽ᠠᠮᠠᠷᠬᠠᠨ ᠪᠠᠶᠠᠷᠯᠠᠵᠦ ᠳᠦᠭᠦᠮᠬᠡᠨ ᠵᠢᠷᠭᠠᠨ᠎ᠠ︾ ᠪᠢ ᠲᠡᠭᠦᠨ ᠤ ᠦᠭᠡ ᠶᠢ ᠰᠢᠪᠡᠨᠡᠨ ᠳᠠᠪᠳᠠᠵᠦ᠂ ᠨᠠᠶᠢᠵᠢ  ᠶᠢᠨ ᠮᠢᠨᠢ ᠳᠦᠰᠦᠪ ᠭᠡᠳᠡᠭ ᠨᠢ ᠶᠠᠭ ᠯᠠ ᠤᠳᠤ ᠶᠢᠨ ᠮᠢᠨᠤ ᠠᠮᠢᠳᠤᠷᠠᠯ ᠲᠠᠢ ᠡᠭᠡᠭᠡ ᠠᠳᠠᠯᠢᠬᠠᠨ ᠪᠢᠰᠢᠤ︖ ᠵᠠ᠂ ᠵᠠ᠂ ᠨᠠᠶᠢᠵᠢ ᠶᠢᠨ ᠢᠶᠠᠨ ᠵᠤᠯ ᠵᠢᠷᠭᠠᠯ ᠤᠨ ᠡᠷᠢᠯ ᠢᠶᠠᠷ ᠮᠠᠨ ᠤ ᠪᠠᠨ ᠳᠤᠮᠳᠠ ᠪᠤᠴᠠᠵᠦ ᠬᠠᠷᠢᠬᠤ ᠪᠠᠷ ᠪᠤᠯᠤᠭᠰᠠᠨ  ᠨᠢ ᠰᠠᠶᠢᠨ ᠪᠤᠯᠤᠯ᠎ᠠ᠃ ᠪᠢᠳᠡ ᠴᠢᠨᠢ ᠵᠢᠷᠭᠠᠯ ᠲᠠᠢ ᠬᠠᠮᠳᠤ ᠪᠠᠶᠢᠵᠦ ᠪᠠᠶᠢᠭᠠᠳ ᠤᠪᠠᠶᠢᠯᠠᠭᠰᠠᠨ ᠴᠦ ᠦᠭᠡᠢ᠂ ᠴᠤᠬᠤᠮ ᠴᠦ ᠨᠢᠭᠡ ︽ᠠᠶᠠᠭᠠᠨ ᠳᠠᠬᠢ ᠪᠠᠨ ᠢᠳᠡᠵᠦ ᠪᠠᠶᠢᠭᠠᠳ ᠲᠤᠭᠤᠭᠠᠨ ᠳᠠᠬᠢ ᠶᠢ ᠦᠡᠭᠭᠡᠶᠢᠭᠰᠡᠨ︾ ᠶᠠᠪᠤᠳᠠᠯ ᠪᠤᠯᠤᠯ᠎ᠠ᠃ ᠵᠢᠷᠭᠠᠯ ᠭᠡᠳᠡᠭ ᠴᠢᠨᠢ ᠮᠡᠳᠡᠷᠡᠮᠵᠢ ᠪᠠᠷ ᠢᠷᠡᠳᠡᠭ ᠶᠠᠭᠤᠮ᠎ᠠ ᠴᠦ ᠶᠤᠮ ᠤᠤ︖ ᠶᠠᠭᠤ ᠴᠦ ᠭᠡᠰᠡᠨ ᠮᠠᠷᠭᠠᠰᠢ ᠪᠤᠴᠠᠯᠭᠠᠨ ᠳᠠᠭᠠᠨ ᠬᠤᠰᠢᠭᠤᠨ ᠳᠦᠪ ᠲᠤ ᠪᠠᠶᠢᠭ᠎ᠠ ᠭᠠᠨᠳᠢᠭ ᠰᠡᠷᠮᠡᠭᠦᠨ ᠰᠢᠭ ᠬᠤᠳᠠ ᠤᠷᠤᠭᠰᠠᠨ ᠨᠠᠶᠢᠵᠢ ᠨᠠᠷ  ᠲᠠᠭᠠᠨ ᠦᠷᠨᠢᠩᠭᠦᠢ ᠶᠢᠨ ᠳᠦᠰᠦᠪ ᠢ ᠬᠡᠯᠡᠵᠦ ᠦᠭᠭᠦᠨ᠎ᠡ᠃              ︽ᠰᠦᠷᠦᠭ ᠢᠶᠠᠷ ᠬᠤᠳᠠᠯᠳᠤᠬᠤ ᠦᠬᠡᠷ᠂ ᠠᠵᠢᠷᠭ᠎ᠠ ᠪᠠᠷ ᠬᠤᠳᠠᠯᠳᠤᠬᠤ ᠠᠳᠤᠭᠤ ᠰᠤᠷᠠᠭᠯᠠᠵᠦ ᠪᠠᠶᠢᠭᠠᠷᠠᠢ︕ ᠨᠠᠶᠢᠵᠢ ᠶᠢᠨ ᠬᠢᠨᠢ ᠲᠦᠯᠦᠪᠯᠯᠡᠭᠡ ᠪᠠᠷᠢᠨ ᠡᠬᠢᠯᠡᠨ᠎ᠡ᠃ ᠨᠠᠶᠢᠵᠢ ᠨᠢ ᠨᠤᠳᠤᠭ ᠲᠠᠭᠠᠨ ᠨᠡᠭᠦᠵᠦ ᠬᠠᠷᠢᠨ᠎ᠠ ᠭᠡᠵᠦ ᠪᠤᠳᠤᠬᠤ ᠪᠠᠷ ᠬᠡᠶᠢᠷᠬᠡᠬᠡᠳ ᠪᠠᠶᠢᠨ᠎ᠠ︾ ᠭᠡᠵᠦ ᠬᠡᠯᠡᠭᠡᠳ ᠨᠡᠳᠠᠳᠤ ᠡᠭᠦᠳᠡ ᠨᠡᠭᠡᠭᠡᠵᠦ ᠦᠭᠭᠦᠯ᠎ᠡ᠃                ᠴᠢ ᠮᠢᠨᠢ ᠨᠠᠮᠠᠢᠢ ᠪᠠᠨ ᠭᠠᠭᠴᠠ ᠴᠦ ᠬᠤᠨᠤᠭ᠎ᠠ ᠦᠭᠡᠢ ᠪᠠᠷ ᠬᠦᠳᠡᠭᠡ ᠳᠡᠭᠡᠨ ᠪᠤᠴᠠᠬᠤ ᠪᠠᠷ ᠶᠠᠭᠠᠷᠠᠵᠦ ᠬᠡᠶᠢᠷᠬᠡᠬᠦ ᠪᠤᠯᠭᠠᠴᠢᠬᠠᠯ᠎ᠠ ᠰᠢᠳᠠ ᠭᠡᠵᠦ ᠪᠤᠳᠤᠭᠰᠠᠨ ᠪᠢ ᠨᠠᠶᠢᠵᠢ ᠶᠢ ᠪᠠᠨ ᠲᠡᠪᠡᠷᠢᠭᠡᠳ ᠦᠨᠤᠰᠦᠮᠡᠷ ᠰᠠᠨᠠᠭᠳᠠᠯ᠎ᠠ᠃
 
ᠢᠷᠡᠯᠲᠡ᠄ ᠲᠣᠲᠣᠷᠬᠠᠢ ᠦᠭᠡᠢ
 
 
ᠬᠠᠮᠢᠶ᠎ᠡ ᠪᠦᠬᠦᠢ ᠰᠣᠨᠢᠨ
  
ᠠᠶᠢᠷᠠᠭ ᠤᠨ ᠢᠷᠦᠬᠡᠯ
ᠵᠡᠭᠦᠳᠦᠨ ᠴᠡᠩᠭᠡᠷ ᠬᠦᠳᠡᠭᠡ
ᠡᠷᠭᠢᠵᠦ ᠰᠠᠨᠠᠭᠳᠠᠬᠤ ᠡᠬᠡ ᠨᠤᠳᠤᠭ
ᠮᠡᠳᠡᠯᠭᠡ ᠰᠤᠷᠤᠶ᠎ᠠ
ᠠᠪᠤ ᠡᠵᠢ ᠬᠤᠶᠠᠷ
2014-2015 ©  ᠦᠪᠦᠷ ᠮᠣᠩᠭᠤᠯ ᠤᠨ ᠮᠦᠩᠭᠡᠭᠠᠯ ᠰᠣᠹᠲ ᠤᠨ ᠬᠤᠪᠢᠴᠠᠭᠠᠨ ᠤ ᠬᠢᠵᠠᠭᠠᠷᠲᠦ ᠺᠣᠮᠫᠠᠨᠢ ᠪᠦᠬᠦ ᠵᠦᠢᠯ ᠬᠠᠤᠯᠢ ᠪᠠᠷ ᠬᠠᠮᠠᠭᠠᠯᠠᠭᠳᠠᠭᠰᠠᠨ᠂ ᠵᠦᠪᠰᠢᠶᠡᠷᠡᠯ ᠦᠭᠡᠢ ᠪᠠᠷ ᠬᠠᠭᠤᠯᠪᠤᠷᠢᠯᠠᠬᠤ ᠶᠢ ᠡᠷᠡᠰ ᠬᠤᠷᠢᠭᠯᠠᠨ᠎ᠠ 蒙ICP备05070829号